ავსტრიის დედაქალაქ ვენაში აღარ გაიმართება ამერიკელი პოპვარსკვლავის, ტეილორ სვიფტის კონცერტები. ორგანიზატორებმა გადაწყვეტილება მას შემდეგ მიიღეს, რაც ავსტრიის პოლიციამ დააკავა ტერაქტების მომზადებაში ეჭვმიტანილი ორი პირი. ტეილორ სვიფტის შოუს ორგანიზატორმა, კომპანია Barracuda Music-მა, 7 აგვისტოს გვიან საღამოს გამოაცხადა, რომ ხელისუფლების მიერ დადასტურებულია, რომ სტადიონ „ერნსტ ჰაპელზე” ტერაქტი იგეგმებოდა. კომპანიის განმარტებით, არ აქვთ სხვა არჩევანი, გარდა იმისა, რომ საერთო უსაფრთხოების მიზნით, სამივე კონცერტი გააუქმონ. ამერიკელი პოპმომღერლის კონცერტები ვენის სტადიონზე 8, 9 და 10 აგვისტოს უნდა გამართულიყო. მაყურებლებს ბილეთებს უახლოეს ათ დღეში დაუბრუნებენ. ავსტრიის პოლიციამ ვენაში და ქალაქ ტერნიცში 7 აგვისტოს დააკავა ორი პირი, რომლებიც სამართალდამცავების ცნობით, ვენასა და მის შემოგარენში ტერაქტებს გეგმავდნენ მასობრივ ღონისძიებებზე. ავსტრიის შინაგან საქმეთა სამინისტროს თანახმად, ერთ-ერთი ეჭვმიტანილი ავსტრიის მოქალაქე, 19 წლის ბიჭია, რომელმაც ივლისის დასაწყისში, ინტერნეტით „ერთგულება შეჰფიცა“ ექსტრემისტულ დაჯგუფება „ისლამურ სახელმწიფოს“. სამართალდამცავების ინფორმაციით, ეჭვმიტანილის სამიზნე კონკრეტულად სვიფტის კონცერტი იყო. მეორე დაკავებულის შესახებ ჯერჯერობით არაფერს იუწყებიან. ავსტრიის ფედერალურმა კანცლერმა კარლ ნეჰამერმა განაცხადა, რომ ტრაგედია თავიდან აიცილეს ავსტრიის პოლიციის და უცხოეთის სპეცსამსახურების ინტენსიური თანამშრომლობის და საფრთხის ადრეულ ეტაპზე აღმოჩენის შედეგად. გვიან ღამით ნეჰამერმა სოციალურ ქსელ X-ში დაწერა, რომ ტეილორ სვიფტის თაყვანისმცემლებისთვის კონცერტების გაუქმება დიდი იმედგაცრუებაა, თუმცა აშკარად დაგეგმილი ტერაქტის გამო სიტუაცია ძალიან სერიოზული იყო. три ავსტრიის პოლიციის ინფორმაციით, ტეილორ სვიფტის თითოეულ კონცერტს 65 ათასამდე მაყურებელი უნდა დასწრებოდა. ამერიკელმა პოპვარსკვლავმა ევროპული ტურნე მაისში პარიზიდან დაიწყო და საფრანგეთის შემდეგ კონცერტები გამართა შვედეთში, პორტუგალიაში, ესპანეთში, ნიდერლანდში, შვეიცარიაში, იტალიაში, გერმანიასა და პოლონეთში. ...