უკრაინელი სამხედრო ექსპერტი მიხაილო სამუსი ფიქრობს, რომ რუსეთის კურსკის ოლქში მიმდინარე ოპერაცია ნაწილია უკრაინის სამხედრო სარდლობის გეგმისა, რომელიც მიზნად ისახავს რუსეთის შეტევითი შესაძლებლობების თანდათანობით შერყევას. "მე ვწინასწარმეტყველებდი, რომ უკრაინის სარდლობა ჩაატარებდა არასტანდარტულ ოპერაციას, რათა შეერყია შესაძლებლობები, რომლებსაც რუსეთი დონბასში შეტევითი ოპერაციების ჩატარებისთვის იყენებს. რუსეთის არმიამ, კრემლის ბრძანებით, ამა წლის ნოემბრამდე, ანუ აშშ-ში პრეზიდენტის არჩევნებამდე უნდა დაასრულოს დონბასის სრული ოკუპაცია. რუსეთი რთავს მთელ ძალებს, მთელ რეზერვებს, რათა დიდი დანაკარგების მიუხედავად, განაგრძოს წინსვლა დონბასში. მაგრამ დანაკარგები მათ არ აჩერებთ, ვინაიდან არსებობს კრემლის ბრძანება", - უთხრა მიხაილო სამუსმა რადიო თავისუფლების ქართულ სამსახურს. უკრაინის შეიარაღებული ძალების რეგულარული დანაყოფები 6 აგვისტოს შეიჭრნენ კურსკის ოლქის სუჯის რაიონში. ასევე ნახეთ ვანო ნადირაძე: გიორგი ფარცვანია ხელმძღვანელობდა კურსკში ერთ-ერთი სადაზვერვო ჯგუფის შესვლას მიუხედავად იმისა, რომ უკრაინის სამხედრო უწყება და გენერალური შტაბი არ აკეთებენ კომენტარებს კურსკში განვითარებულ მოვლენებზე, მიხაილო სამუსი დარწმუნებულია, რომ კურსკში მიმდინარე სადესანტო ოპერაციას მჭიდრო კავშირი აქვს 6 აგვისტოს ხერსონის ოლქში, ტენდრის ყურეში (Те́ндровская коса́), განხორციელებულ რეიდთან. "ასეთ ვითარებაში ნებისმიერმა ასიმეტრიულმა ოპერაციამ - იქნება ეს ჩრდილო-აღმოსავლეთსა თუ სამხრეთში, ყირიმის გარშემო თუ ყირიმის მახლობლად, როგორიც იყო 6 აგვისტოს, ღამით, სპეციალური ოპერაციების ძალებისა და სამხედრო დაზვერვის სამმართველოს ერთობლივი რეიდი საზღვაო (ტენდრის) ყურეში - უნდა აიძულოს რუსეთის სარდლობა ან შეაჩეროს შეტევა დონბასში, რითაც განეიტრალდება არსებული საფრთხე ჩრდილო-აღმოსავლეთსა და სამხრეთში, ან რუსეთი ჩათვლის, რომ უკრაინას არ ძალუძს არანაირი სერიოზული წარმატების მიღწევა ფრონტის სხვა უბნებზე - თუ არ ჩავთვლით რუსეთისათვის ისეთი უმნიშვნელო საფრთხის შექმნას, როგორიც იყო უკრაინის მხარეზე მებრძოლი "რუსეთის მოხალისეთა კორპუსისა" და რუსეთის სხვა მოხალისეთა ჯგუფების შარშანდელი რეიდი ბელგოროდში. ასეთ შემთხვევაში, რუსეთი გააგრძელებს შეუფერხებელ წინსვლას დონბასში და აღარ მოუწევს რეზერვის გადასროლა უკრაინის სამხრეთში. ამიტომ, ჩემი აზრით, შექმნილ ვითარებაში უკრაინის სამხედრო სარდლობა ცდილობს რუსეთის ძალების თანდათანობით შერყევას. თუ რუსეთი არ გადაისვრის თავის რეზერვებს კურსკის ოლქის დასაცავად, ხოლო იმავე მომენტში უკრაინა განახორციელებს ოპერაციებს სხვა, მათ შორის სამხრეთ მიმართულებაზე, კერძოდ, ხერსონის მარცხენა ნაპირზე და ყირიმზე, ასეთ შემთხვევაში ფრონტზე ვითარება შესაძ...