რუსეთის კურსკის ოლქის ხელისუფლება უკრაინელების მხრიდან რაკეტებით და დრონებით მორიგი შეტევის შესახებ იუწყება. ოლქის გუბერნატორის მოვალეობის შემსრულებელმა ალექსეი სმირნოვმა დღეს, 9 აგვისტოს დილით, ტელეგრამით გაავრცელა ცნობა, რომ მოგერიებულია ოთხი უკრაინული რაკეტა და ამდენივე დრონი. კურსკის ოლქში 6 აგვისტოდან გრძელდება სახმელეთო ბრძოლაც, რომლის შესახებ უკრაინის თავდაცვის სამინისტრო და გენერალური შტაბი ოფიციალურად არაფერს ამბობენ. ამასთან, 8 აგვისტოს უკრაინის არმიის მთავარსარდალმა ოლექსანდრ სირსკიმ ტელეგრამ-არხზე გამოაქვეყნა პოსტი, რომელიც მედიამ კურსკის ოპერაციაზე მინიშნებად შეაფასა. კერძოდ, სირსკიმ გამოაქვეყნა რამდენიმე სამხედროსთან ერთად ტყის ბილიკზე გადაღებული ფოტო, წარწერით, რომ გამსვლელ რაიონში მუშაობს. როგორც გამოცემა „უკრაინსკა პრავდა" წერს, ასე უწოდებენ ადგილს, საიდანაც ქვედანაყოფები შეტევაზე გადასვლას იწყებენ. 8 აგვისტოს, უკრაინელებისადმი ვიდეომიმართვისას, პრეზიდენტმა ვოლოდიმირ ზელენსკიმ განაცხადა, რომ ოლექსანდრ სირსკისგან მიიღო სამი „შედეგიანი მოხსენება, სწორედ ისეთი, როგორიც სახელმწიფოს ახლა სჭირდება“. ზელენსკის დეტალები არ დაუკონკრეტებია და არც კურსკის ოლქი არ უხსენებია, თუმცა თქვა, რომ უკრაინის მიწაზე ომი რუსეთმა მოიტანა და უნდა იგრძნოს, რაც გააკეთა. ასევე ნახეთ უკრაინის შეიარაღებული ძალები საფორტიფიკაციო ნაგებობებს აშენებენ კურსკის რეგიონში ასევე ნახეთ მიხაილო სამუსი: "მსგავსმა ასიმეტრიულმა ოპერაციებმა უნდა აიძულოს რუსეთი, შეაჩეროს შეტევა დონბასში" რუსეთის თავდაცვის სამინისტრომ 8 აგვისტოს განაცხადა, რომ საბრძოლო მოქმედებები გრძელდება კურსკის ოლქის სუჯის და კორენევსკის რაიონებში. ეს ტერიტორია უკრაინის სუმის ოლქს ესაზღვრება. რუსეთის თავდაცვის სამინისტროს მტკიცებით, ავიაციის და სარაკეტო და საარტილერიო ძალების მოქმედების შედეგად მოწინააღმდეგის წინსვლა აღკვეთილია. სხვა წყაროები, მათ შორის კრემლის მხარდამჭერი ე.წ. სამხედრო ბლოგერებიც, ამას არ ადასტურებენ. ასევე ნახეთ პუტინი 10 000 რუბლს დაჰპირდა კურსკის თითოეულ მაცხოვრებელს, რომელმაც ბრძოლის გამო საკუთარი სახლი დატოვა რუსეთმა 6 აგვისტოს გამოაცხადა, რომ უკრაინის შეიარაღებული ძალების სამხედროები კურსკის ოლქის ტერიტორიაზე შეიჭრნენ. 7 აგვისტოდან კურსკის ოლქში საგანგებო მდგომარეობის რეჟიმი ამოქმედდა. რუსეთის პრეზიდენტმა პუტინმა კურსკის ოლქში განვითარებულ მოვლენებს „კიევის რეჟიმის მასშტაბური პროვოკაცია“ უწოდა. რუსეთის გენშტაბის უფროსი გერასიმოვი პუტინს დაჰპირდა, რომ ოპერაცია უკრაინის ძალების „სრული განადგურებით" დასრულდება. ასევე ნახეთ მედვედევი „ჯერ კიდევ არსებული უკრაინის“ დაპყრობასაც მოითხოვს ...