ღაზის სექტორში მდებარე სკოლაზე ისრაელის საჰაერო იერიშს 100-ზე მეტი ადამიანი ემსხვერპლა და ათობით დაშავდა. ამის შესახებ Reuters-ი წერს ღაზის სექტორის ხელისუფლებაზე დაყრდნობით, რომელსაც აკონტროლებს დაჯგუფება ჰამასი (აშშ-სა და ევროკავშირში ჰამასი ტერორისტულ ორგანიზაციად არის აღიარებული). ისრაელმა სკოლის შენობაზე თავდასხმა აღიარა და განაცხადა, რომ მასში განთავსებული იყო ჰამასის სამეთაურო ცენტრი. ისრაელი ჯგუფს ადანაშაულებს ლტოლვილების სიკვდილში და მას სკოლებისა და საცხოვრებელი ადგილების ბაზებად გამოყენებაში სდებს ბრალს. ეს დარტყმა ყველაზე მომაკვდინებელი იყო ათი თვის განმავლობაში ღაზის სექტორში ისრაელის მიერ წარმოებული სამხედრო ოპერაციის განმავლობაში, აღნიშნავს Associated Press-ი. სკოლაში იმყოფებოდნენ პალესტინელები, რომლებიც ომის გამო იძულებულნი იყვნენ, დაეტოვებინათ თავიანთი სახლები. თვითმხილველები ამბობენ, რომ დარტყმა გაფრთხილების გარეშე განხორციელდა მზის ამოსვლამდე, როდესაც ხალხი დილის ლოცვას ასრულებდა. როგორც იტყობინებიან, გამოყენებულ იქნა ორი რაკეტა. ისრაელი ღაზის სექტორში სამხედრო ოპერაციას ახორციელებს 2023 წლის 7 ოქტომბერს სამხრეთ ისრაელში ჰამასის თავდასხმის საპასუხოდ. მაშინ ისრაელში 1200-ზე მეტი ადამიანი დაიღუპა, ორასზე მეტი დაატყვევეს და წაიყვანეს ღაზაში. ისრაელი აცხადებს, რომ მისი მიზანია ჰამასის სრული განადგურება. ჰამასის მიერ კონტროლირებადი ღაზის ჯანდაცვის სამინისტროს მონაცემებით, ისრაელის იერიშების შედეგად დაიღუპა თითქმის 40 ათასი პალესტინელი, ძირითადად ქალები და ბავშვები. ამ მონაცემების დამოუკიდებელი წყაროებით დადასტურება არ ხერხდება. 2,3 მილიონიდან თითქმის ორი მილიონი იქცა ლტოლვილად და ახლა ისინი ღაზის სექტორის სამხრეთ ნაწილში მდებარე კარვების ბანაკებს აფარებენ თავს. ...