ისრაელის თავდაცვის არმიის მეთაურობამ (ცაჰალი) 11 აგვისტოს, საღამოს, გამოსცა განკარგულება, რომელიც ისრაელელ სამხედრო მოსამსახურეებს საქართველოსა და აზერბაიჯანში ყოფნას უკრძალავს. გადაწყვეტილება მიღებულია ირანის მუქარის ფონზე, შეუტიოს ისრაელის სამიზნეებს საზღვარგარეთ. აზერბაიჯანსა და საქართველოში მყოფ სამხედრო მოსამსახურეებს უბრძანეს, დაუყოვნებლივ დატოვონ ეს ქვეყნები. ბრძანება შეეხება როგორც წვევამდელებს, ასევე საკონტრაქტო ჯარისკაცებს. ისინი საქართველოსა და აზერბაიჯანში შესაძლოა ხანმოკლე შვებულებით ან ოჯახების მოსანახულებლად იმყოფებოდნენ, აზუსტებს ისრაელის მედია და ამატებს, რომ ორივე ქვეყანა ირანთან ახლოსაა, აზერბაიჯანს აქვს პირდაპირი საზღვარი ისლამურ რესპუბლიკასთან. „ორივე ქვეყანა, აზერბაიჯანი და საქართველო, ინარჩუნებენ მეგობრულ ურთიერთობას ირანთან და აქვთ დიდი ირანული თემები“. ირანი ისრაელს საპასუხო ზომებით დაემუქრა მას შემდეგ, რაც 31 ივლისს თეირანში მოკლეს პალესტინელთა რადიკალური ისლამისტური მოძრაობა ჰამასის პოლიტიკური ბიუროს ხელმძღვანელი ისმაილ ჰანიე. ჰამასმა და ირანმა მკვლელობაში ისრაელი დაადანაშაულეს. მოგვიანებით ამერიკელმა წყაროებმა განაცხადეს, რომ ირანმა შესაძლოა უარი თქვას თავდაპირველ გეგმებზე. შეერთებულმა შტატებმა დიპლომატიური წყაროების მეშვეობით გაავრცელა გაფრთხილება, რომ მასიური დარტყმა გაზრდის დაძაბულობას რეგიონში და შექმნის ირანსა და ისრაელს შორის პირდაპირი კონფრონტაციის რისკს. ...