ატომური ენერგიის საერთაშორისო სააგენტოს(IAEA) ექსპერტებმა დაათვალიერეს ზაპოროჟიეს ატომური ელექტროსადგურის ტერიტორიაზე მდებარე წყლის გაგრილების კოშკი, სადაც 11 აგვისტოს, საღამოს, ხანძარი იყო. სააგენტოს მიერ 12 აგვისტოს, გვიან ღამით გამოქვეყნებული ინფორმაციით, სპეციალისტებს არ აღმოუჩენიათ არც დამწვარი საბურავების და არც უპილოტო საფრენი აპარატის კვალი. ატომური ენერგიის საერთაშორისო სააგენტოს ექსპერტებმა ამ ეტაპზე ვერ შეძლეს ხანძრის გამომწვევი მიზეზის დადგენა და დამატებით კვლევას ჩაატარებენ. ამასთან, სააგენტოს სპეციალისტებმა დაადასტურეს, რომ ატომური ელექტროსადგურის ტერიტორიაზე რადიაციის დონე მომატებული არ არის. ასევე ნახეთ ხანძარი იყო ზაპოროჟიეს ატომური ელექტროსადგურის ტერიტორიაზე უკრაინამ და რუსეთმა ზაპოროჟიეს ატომური ელექტროსადგურის ტერიტორიაზე ხანძრის გამო ერთმანეთი დაადანაშაულეს. რუსული მხარის განცხადებით, ხანძარი უკრაინული დრონით დარტყმამ გამოიწვია. უკრაინამ გამომწვევ მიზეზად დაასახელა საოკუპაციო ძალების მიერ ცეცხლის განზრახ გაჩენა ან გულგრილობა, მათ შორის საბურავების დაწვა. უკრაინის ზაპოროჟიეს ოლქის ის ნაწილი, სადაც ევროპაში უდიდესი ატომური ელექტროსადგური მდებარეობს, რუსეთის მიერ ოკუპირებულია 2022 წლის მარტიდან. სადგურს რუსეთის მიერ დანიშნული ადმინისტრაცია მართავს. მონიტორინგის მიზნით ტერიტორიაზე იმყოფება ატომური ენერგიის საერთაშორისო სააგენტოს რამდენიმე ექსპერტი. ...