ზუგდიდში, ბუკიას ქუჩაზე, ხანძრის შედეგად დაღუპული 6 წლის ტყუპი ძმების ოჯახი სოციალურად დაუცველი იყო. ამის შესახებ ოჯახის მეზობლები ჰყვებიან. დედა ოთხ შვილს მარტო ზრდიდა, ბინა კი, სადაც 12 აგვისტოს ღამით ხანძარი გაჩნდა, დაქირავებული ჰქონდა. მეზობლების თანახმად, ოჯახს დავალიანების გამო გათიშული ჰქონდა ელექტროენერგია. ხანძრის გაჩენის მიზეზი, მათი ვარაუდით, შეიძლება გამხდარიყო სანთელი, რომელიც შინ მარტო მყოფ ბავშვებს ჩაძინებისას შესაძლოა ანთებული დარჩათ. რადიო თავისუფლების ინფორმაციით, ოთხი ბავშვი (6 წლის ტყუპი ძმები, ასევე მეექვსე და მეხუთეკლასელი და-ძმა) ოჯახში მძიმე სოციალური პირობების გამო, გარკვეული პერიოდით მინდობით აღზრდაში იმყოფებოდა. მათზე ზუგდიდში მცხოვრები ოჯახი ზრუნავდა, თუმცა მოგვიანებით ისინი დედას დაუბრუნდნენ. ასევე ნახეთ ზუგდიდში ხანძარს ორი ბავშვი ემსხვერპლა როგორც მეზობლები ჰყვებიან, დედას მძიმე ფიზიკური შრომა უწევდა და ბავშვები ხშირად რჩებოდნენ მარტო. ისინი მარტო იყვნენ, როცა ცხრასართულიანი კორპუსის მეექვსე სართულზე ხანძარი გაჩნდა. უფროსმა და-ძმამ ბინიდან დროულად გამოსვლა შეძლო. 6 წლის ტყუპები კი ადგილზე მისულ მაშველებს გარდაცვლილები დახვდათ. მოზარდები, რომლებიც ხანძარს გადაურჩნენ, ზუგდიდის რეფერალურ ჰოსპიტალში იმყოფებიან. როგორც ექიმები ამბობენ, მათ სიცოცხლეს საფრთხე არ ემუქრება. მომხდარზე ჯერჯერობით კომენტარს არ აკეთებენ სოციალური მომსახურების სააგენტოში. მედიასთან საუბარი არ სურს ოჯახსაც, რომელშიც ბავშვები დროებით მინდობით აღზრდაში იმყოფებოდნენ. რადიო თავისუფლებას შინაგან საქმეთა სამინისტროში განუცხადეს, რომ მომხდარზე გამოძიება სისხლის სამართლის კოდექსის 188-ე მუხლით დაიწყო, რაც ითვალისწინებს ნივთის დაზიანებას ან განადგურებას გაუფრთხილებლობით, რამაც გამოიწვია ადამიანის სიცოცხლის მოსპობა. ...