აფეთქებები იყო რუსეთის ცენტრალურ ნაწილში მდებარე ვორონეჟის ოლქში. მათ შორის რეგიონულ ცენტრში, ქალაქ ვორონეჟში, რომელსაც რუსეთის საჰაერო-სადესანტო ძალების „სამშობლოს“ უწოდებენ. ოლქის გუბერნატორმა ალექსანდრ გუსევმა ადგილობრივი დროით ღამის ოთხის ნახევრისთვის ტელეგრამით გაავრცელა ცნობა, რომ „ლიკვიდირებულია დიდი რაოდენობით“ უკრაინული უპილოტო საფრენი აპარატები. მათი რიცხვი გუსევს არ დაუკონკრეტებია. გუბერნატორის ინფორმაციით, დრონების ნამსხვრევებით დაზიანებულია სახლები, ტრანსპორტი და ცეცხლი გაუჩნდა „ხმელ მცენარეულობას". ამასთან, რუსული ტელეგრამ-არხები წერენ, რომ სავარაუდოდ, დრონებით შეტევა იყო ქალაქ ვორონეჟში მდებარე სამხედრო აეროდრომ „ბალტიმორზე“. უკრაინული წყაროების თანახმად, რუსეთის არმია ამ აეროდრომს იყენებს უკრაინის ტერიტორიაზე დარტყმებისთვის. რუსული ტელეგრამ-არხების ცნობით, აფეთქებები იყო ვორონეჟიდან 200 კილომეტრში მდებარე ქალაქ ბორისოგლებსკშიც, სადაც საავიაციო ცენტრი და სამხედრო აეროდრომი მდებარეობს. ამ რაიონზე დრონებით თავდასხმა იყო აპრილშიც, რაც უკრაინის თავდაცვის სამინისტრომ დაადასტურა. ვორონეჟის ოლქზე დღევანდელი შეტევის შესახებ უკრაინას ჯერჯერობით არაფერი უთქვამს. ბოლო თვეებში რუსეთის ამ რეგიონში მდებარე სამხედრო ობიექტებსა და ნავთობგადამამუშავებელ ქარხნებზე დრონებით არაერთი შეტევა იყო. უკრაინას, რომელიც ორ წელზე მეტია რუსეთის სამხედრო აგრესიას ებრძვის, კანონიერ სამიზნედ აქვს გამოცხადებული სამხედრო ობიექტები და საწარმოები, რომლებიც რუსეთის არმიის მომარაგებაზე მუშაობენ. 2024 აგვისტოში უკრაინის შეიარაღებულმა ძალებმა სახმელეთო ოპერაციაც დაიწყეს რუსეთის კურსკის და ბელგოროდის ოლქებში. ასევე ნახეთ გენერალი სირსკი: უკრაინა კურსკის ოლქში 74 დასახლებულ პუნქტს აკონტროლებს ...