ენტეროვირუსის ნიშნებით პატიმრების ქუთაისის N2 სასჯელაღსრულების დაწესებულებიდან თბილისში, კლინიკა "ვივამედში", გადაყვანის შესახებ ინფორმაციას ადვოკატებზე დაყრდნობით ავრცელებენ ტელეკომპანიები "მთავარი არხი" და "ფორმულა". "ვივამედის" კლინიკურმა დირექტორმა ზურაბ ჩხაიძემ რადიო თავისუფლებას უთხრა, რომ დილის მონაცემებით, კლინიკაში იმყოფება ქუთაისიდან გადაყვანილი რვა პატიმარი, მათი ჯანმრთელობის მდგომარეობა სტაბილურია და ელოდებიან ანალიზების პასუხებს. "გუშინაც, დღესაც შემოვიდნენ პატიმარი პაციენტები და მათ შორის არიან ქუთაისიდანაც. დილის მონაცემებით, რვა პაციენტია, რომლებსაც აქვთ ენტეროვირუსისთვის დამახასიათებელი ჩივილები. ზაფხულის პერიოდია, გასაკვირი არაფერი არ არის. არანაირი მძიმე ფორმით, სტაბილური პაციენტებია. დღესვე ითხოვენ გაწერას, მაგრამ ანალიზებია ჩაბარებული, ბაქტერიოლოგიური კვლევა ჩატარდება და ანალიზების პასუხების შემდეგ გაეწერებიან. რვავე პაციენტი სტაბილურია, დამაკმაყოფილებელ მდგომარეობაში“, - თქვა ზურაბ ჩხაიძემ. მოგვიანებით იუსტიციის სამინისტრომ, რომლის დაქვემდებარებაშიცაა სასჯელაღსრულებისა და პენიტენციური სამსახური განცხადება გაავრცელა, რომლის თანახმად "13 აგვისტოს N2 პენიტენციური დაწესებულების მსჯავრდებულთა შორის გამოვლენილი ჩივილი შეესაბამება შესაძლო ენტრო ვირუსული ინფექციის სიმპტომებს. მდგომარეობის შესაძლო გართლების პრევენციის მიზნით, მსჯავრდებულთა ნაწილი გადაყვანილ იქნა სამოქალაქო სექტორის კლინიკაში." უწყების თანახმად ექიმ-სპეციალისტთა მიერ მათი მდგომარეობა შეფასდა როგორც სტაბილური, მსუბუქი ხარისხის დარღვევებით. "პაციენტებს გაეწიათ შესაბამისი სამედიცინო მომსახურება, ჩაუტარდათ ლაბორატორიული კვლევები და დაბრუნდებიან დაწესებულებაში სასჯელის მოხდის ადგილას. ამ ეტაპზე ყველა მსჯავრდებულის მდგომარეობა სტაბილური და დამაკმაყოფილებელია, იმყოფებიან სამედიცინო პერსონალის მუდმივი მეთვალყურეობის ქვეშ", - ნათქვამია იუსტიციის სამინისტროს მიერ გავრცელებულ ინფორმაციაში. მასალა განახლდა, იუსტიციის სამინისტროსგან მიღებული პასუხით. ...