უკრაინის შეიარაღებული ძალების გენერალურმა შტაბმა ოფიციალურად გამოაცხადა, რომ თავდაცვის ძალებმა იერიში მიიტანეს რუსეთის ოთხ სამხედრო აეროდრომზე. გენშტაბმა 14 აგვისტოს, გვიან ღამით, დაადასტურა მანამდე მედიით გავრცელებული ცნობა, რომ უკრაინელებმა დრონებით დაარტყეს სამხედრო აეროდრომებს რუსეთის ვორონეჟის, ნიჟნი-ნოვგოროდის და კურსკის ოლქებში. ეს ინფორმაცია ზოგიერთ მედიასაშუალებას 14 აგვისტოს, დღის მეორე ნახევარში, დაუდასტურეს წყაროებმა უკრაინის უსაფრთხოების სამსახურში. უკრაინის შეიარაღებული ძალების გენერალურმა შტაბმა 14 აგვისტოს, დღის ბოლოს, გამოაქვეყნა ოფიციალური ცნობა, რომლის თანახმად, არმიის საჰაერო და სპეციალური ოპერაციების ძალების ქვედანაყოფებმა უსაფრთხოების სამსახურსა და თავდაცვის სამინისტროს დაზვერვის მთავარ სამმართველოსთან ერთად შეუტიეს სამხედრო აეროდრომებს: „ხალინო“, „სავასლეიკა“, „ბორისოგლებსკი“ და „ბალტიმორი“. უკრაინის გენშტაბის ინფორმაციით, ამ აეროდრომებზე განთავსებული არიან რუსეთის არმიის გამანადგურებელი ბომბდამშენები სუ-34, გამანადგურებლები სუ-35 და სხვა სამხედრო საავიაციო ტექნიკა. უკრაინის გენერალური შტაბის ინფორმაციით, მთავარი სამიზნეები იყო საავიაციო საშუალებები და საწვავის გადამტანი შემადგენლობები. გენშტაბში განაცხადეს, რომ შეტევის შედეგები დაზუსტების პროცესშია. რადიო თავისუფლების უკრაინული სამსახურის ჟურნალისტური გამოძიების პროგრამა Схеми-მ გამოაქვეყნა Planet Labs-ის მიერ ვორონეჟის ოლქის ქალაქ ბორისოგლებსკში მდებარე აეროდრომისთვის გადაღებული ფოტოები, რომელთა თანახმად, აეროდრომის ჩრდილო-დასავლეთ ნაწილში დანგრეულია რამდენიმე ანგარი. три უკრაინის გენერალური შტაბის მიერ შეტევის სამიზნეებად დასახელებული სამხედრო აეროდრომი „ხალინო“ კურსკში მდებარეობს, „სავასლეიკა“ - ნიჟნი-ნოვგოროდის ოლქში, ხოლო „ბორისოგლებსკი“ და „ბალტიმორი“ - ვორონეჟის ოლქში. რუსეთის თავდაცვის სამინისტროს მიერ 14 აგვისტოს გამოქვეყნებული ინფორმაცია ამ ოლქებზე დრონებით მასირებულ შეტევას ადასტურებდა, თუმცა ნათქვამი არაფერი იყო სამხედრო აეროდრომებზე დარტყმების და ზოგადად, ხმელეთზე გამოწვეული შედეგების შესახებ. რუსეთის თავდაცვის სამინისტრომ 14 აგვისტოს, დილით განაცხადა, რომ ქვეყნის ტერიტორიაზე მოიგერიეს 117 უკრაინული დრონი, მათ შორის 37-37 კურსკის და ვორონეჟის ოლქებში და 11 - ნიჟნი-ნოვგოროდში. ...