ღონისძიება 15 აგვისტოს თბილისში, სახელმწიფო ცერემონიების სასახლეში (პრეზიდენტის ყოფილი სასახლე ავლაბარში), გაიმართა. "50 000 ლარი პრემია გადაეცემა გუნდის უკლებლივ ყველა წევრს, რომელსაც მედალი არ მოუგია ოლიმპიურ თამაშებზე, თუმცა თავისი წვლილი შეიტანა საერთო წარმატებაში", - თქვა კობახიძემ. მისივე თქმით, ასევე გაზრდილ პრემიებს მიიღებენ მწვრთნელები, სამედიცინო და სხვა პერსონალი, რომლებიც წარმოადგენდნენ საქართველოს ოლიმპიურ გუნდს. კობახიძემ აღნიშნა, რომ სპორტულ ასპარეზობებზე მიღებულ პრიზებთან ერთად, ჩემპიონები წმინდა გიორგის სახელობის გამარჯვების ორდენით, ხოლო პრიზიორები ღირსების ორდენით დაჯილდოვდებიან. "მე კიდევ ერთხელ მინდა აღვნიშნო, რომ ჩვენი პრიზიორები, ჩემპიონები წარვადგინეთ უმაღლეს სახელმწიფო ჯილდოებზე. ჩემპიონების შემთხვევაში, ეს არის წმინდა გიორგის სახელობის გამარჯვების ორდენი, ეს არის პრიზიორებისთვის ღირსების ორდენი", - თქვა მან. სახელმწიფო ცერემონიების სასახლეში გამართულ ღონისძიებაზე მთავრობამ მხოლოდ მიწვეული სტუმრები და ჟურნალისტები დაუშვა. იქ შესვლა არ შეეძლოთ სპორტსმენების ნახვის მსურველ რიგით ადამიანებს. ღონისძიებას არ ესწრებოდა პრეზიდენტი სალომე ზურაბიშვილი. მისი განცხადებით, ცერემონიაზე დასწრების შესახებ მას შეატყობინეს ღონისძიებამდე რამდენიმე საათით ადრე, 13:00 საათზე. 15 აგვისტოს პრეზიდენტმა ამ საკითხზე ბრიფინგი გამართა და თქვა, რომ უარს ამბობს, პარიზის ოლიმპიადაში მონაწილე სპორტსმენები მთავრობის ორგანიზებულ ღონისძიებაზე დააჯილდოოს. „მე ვთვლი, რომ ეს არის ის საკითხი, რომელიც აერთიანებს ქვეყანას, საზოგადოებას და ეს უნდა ვიზეიმოთ ერთად, არა სადღაც ჩაკეტილ სივრცეში, სადაც ხალხის გვეშინია, არამედ სახალხო ზეიმი უნდა იყოს და მე ამას ვაპირებ“, - თქვა ზურაბიშვილმა და დასძინა, რომ პარალიმპიელები, რომლებიც საქართველოს წარმოადგენენ, ქვეყანაში ჯერ არ დაბრუნებულან. ასევე ნახეთ პრეზიდენტმა უარი თქვა, ოლიმპიელები მთავრობის ორგანიზებულ ღონისძიებაზე დაეჯილდოებინა ...