გამთენიისას აფეთქებები იყო რუსეთის მიერ ანექსირებული ყირიმის ქალაქ ქერჩის რიონში. დაიკეტა ყირიმის, იგივე ქერჩის ხიდი. ეს ცნობები რუსეთის ოფიციალური წყაროებით და რუსული და უკრაინული ტელეგრამ-არხებით გავრცელდა. რუსეთის საჰაერო თავდაცვის ძალები, სავარაუდოდ, სარაკეტო შეტევას იგერიებდნენ ყირიმის ხიდის და რუსეთს და ანექსირებულ ყირიმს შორის საბორნე გადასასვლელის რაიონებში. ქალაქი ქერჩი მდებარეობს ყირიმის აღმოსავლეთ ნაწილში, აზოვის და შავი ზღვების დამაკავშირებელი ქერჩის სრუტის ნაპირზე. BBC-ის ცნობით, რუსული მონიტორინგის არხი „პრიგრანიჩიე“ ირწმუნება, რომ ხიდის თავზე რვა რაკეტა ჩამოაგდეს. სხვა წყაროებით ეს ცნობა დადასტურებული არ არის. უკრაინულმა ტელეგრამ-არხმა „კრიმსკი ვეტერმა“ დაწერა, რომ ქალაქ ქერჩის თავზე აფეთქებებია და კვამლი ასდის საბორნე გადასასვლელის რაიონს. რუსეთის ოფიციალური წყაროები მხოლოდ საჰაერო განგაშის და ყირიმის ხიდის დაკეტვის შესახებ იუწყებოდნენ. გარდა ამისა, სევასტოპოლის ე.წ. გუბერნატორმა რაზვოჟაევმა გაავრცელა ცნობა, რომ მოგერიებულია ქალაქზე დრონებით თავდასხმა. უკრაინას ყირიმზე დღევანდელი შეტევის შესახებ ჯერჯერობით არაფერი უთქვამს. განახლება: დილით რუსეთის თავდაცვის სამინისტრომ განაცხადა, რომ შავი ზღვის აკვატორიის თავზე გაანადგურეს ხუთი უკრაინული უპილოტო საფრენი აპარატი და ყირიმის ნახევარკუნძულისკენ მიმავალი ორი უეკიპაჟო კატერი. ამ ცნობაში რუსეთის თავდაცვის სამინისტრო კონკრეტულ რაიონებს არ ასახელებს და არაფერს იუწყება სარაკეტო შეტევის შესახებაც. ასევე ნახეთ The Independent: რუსეთი ყირიმის ხიდს აღარ იყენებს სამხედრო ტვირთის ტრანსპორტირებისთვის ომის დაწყების შემდეგ, უკრაინის თავდაცვის ძალებმა ყირიმის, იგივე ქერჩის, ხიდზე იერიში არაერთხელ მიიტანეს. მათგან ყველაზე ძლიერი იყო 2022 წლის ოქტომბერსა და 2023 წლის ივლისში მომხდარი აფეთქებები, რომლებმაც ხიდი მნიშვნელოვნად დააზიანა. უკრაინა და რუსეთი ქერჩის სრუტეზე სატრანსპორტო გადასასვლელის ერთობლივ მშენებლობაზე 2013 წელს შეთანხმდნენ. 2014 წელს რუსეთმა ყირიმის ანექსია განახორციელა და ხიდი თავად ააშენა. 2018 წელს რუსეთმა ხიდის საავტომობილო ნაწილი გახსნა, ხოლო 2019 წელს - სარკინიგზო. 2022 წლის თებერვალში, უკრაინის ტერიტორიაზე სრულმასშტაბიანი შეჭრისას რუსეთი ყირიმის ხიდს აქტიურად იყენებდა თავისი ჯარების მომარაგებისთვის. ...