OCCRP განმარტავს, რომ მათ არ აქვთ პოლიტიკური ინტერესი საქართველოში, ან მის მიღმა და აღნიშნავს, რომ მათი მისიაა მაღალი საჯარო ინტერესის მქონე ინფორმაციის გასაჯაროება. "OCCRP იაზრებს ამ საკითხის პოლიტიკურ სენსიტიურობას, ჩვენი მისია და ვალდებულებაა, გავავრცელოთ ინფორმაცია, რის მიმართაც შეიძლება არსებობდეს საჯარო ინტერესი. OCCRP არ არის ქართული ორგანიზაცია და არ აქვს პოლიტიკური აფილიცია ან ინტერესი რომელიმე პოლიტიკური პარტიის მიმართ საქართველოში ან მის ფარგლებს მიღმა. OCCRP არის დამოუკიდებელი საგამოძიებო მედია ორგანიზაცია და მისი მიზანია საკუთარ აუდიტორიას ზუსტი და დროული ინფორმაცია მიაწოდოს", - წერია განცხადებაში, რომელიც, ასევე ციტირებს OCCRP-ის რედაქტორს, დრიუ სალივანს: "ეს არის საჯარო ინტერესის საკითხი და არა პოლიტიკის. ჩვენ არ ვაკეთებთ ინფორმაციის ინტერპრეტირებას, არამედ ვაშუქებთ მას. ჩვენ ვეყრდნობით ფაქტებს, რომელსაც წარმოვადგენთ. ისინი ზუსტია". OCCRP, ასევე ასაჯაროვებს დოკუმენტს, რომელიც მათივე თქმით, ჟურნალისტურ გამოძიებაში წარმოდგენილი ფაქტების დამადასტურებელი მტკიცებულებაა: "ეს არის რუსეთის ხელისუფლების მიერ გაცემული ოფიციალური დოკუმენტი, რაც ადასტურებს, რომ ერთ-ერთი უძრავი ქონება - მიწის ნაკვეთი - ეკატერინე ხვედელიძეს ამ წლის დასაწყისში გადაუფორმა ბიძინა ივანიშვილის დეიდაშვილმა - უჩა მამაცაშვილმა". ასევე ნახეთ ჟურნალისტური გამოძიება: ივანიშვილის ოჯახმა მოსკოვში ქონება ბოლო წლებში შეიძინა ივანიშვილის ოჯახი რომ მოსკოვში ქონებას ფლობს, ამის შესახებ საუბარია რამდენიმე მედიასაშუალებისა და არასამთავრობო ორგანიზაციის ერთობლივად მომზადებულ სტატიაში რომელზეც მუშაობდნენ „აი, ფაქტი“, OCCRP, iStories-ი (რუსეთი), GMC, „სტუდია მონიტორი“ და „საერთაშორისო გამჭვირვალობა - საქართველო“. სტატიას 9 აგვისტოს გამოეხმაურა „ქართული ოცნება“ და "სიცრუე" უწოდა გაჟღერებულ ინფორმაციას მოსკოვში ქონების შეძენაზე. პარტიაში განაცხადეს, რომ ივანიშვილს 1998 წლის შემდეგ რუსეთში ქონება არ შეუძენია. „არავისთვის დასამალი არ არის, რომ წლების განმავლობაში ბიძინა ივანიშვილი სწორედ რუსეთში მოღვაწეობდა და აქტივების დიდი ნაწილი ამ ქვეყანაში დააგროვა... დაშვების დონეზე, ყველაფერი სწორედ ისე რომ იყოს, როგორც სტატიაში წერია, ავტორების მიერ მოყვანილი არც ერთი ტყუილი გარემოება არავითარ კანონდარღვევას არ შეიცავს - არც ქონების შეძენა და არც მისი ფლობა“, - წერია „ქართული ოცნების“ განცხადებაში. მასში ასევე აღნიშნულია, რომ ბიძინა ივანიშვილს 2013 წლის ქონებრივ დეკლარაციაში არ დაუმალავს, რომ მისი ცოლი ეკატერინა ხვედელიძე რუსეთის დედაქალაქში ფლობდა საცხოვრებელ სახლს და სამ მიწის ნაკვეთს: „იმ ინფორმაციის „სკანდალად“ წარმოჩინების მცდელობა, რაც 11 წ...