"ქართული ოცნების" საპატიო თავმჯდომარის, ბიძინა ივანიშვილის მიერ აშენებულ საკონცერტო დარბაზ Black Sea Arena-ს და თბილისის ფილარმონიას კულტურის სამინისტროს ნაცვლად მთავრობის ადმინისტრაცია მართავს და განკარგავს - შესაბამისი დადგენილება პრემიერ-მინისტრმა, ირაკლი კობახიძემ 2024 წლის 15 აგვისტოს გამოსცა. ორივე ქონება მთავრობისთვის სამართავად გადაცემულია მათი არსებობის ვადით. დოკუმენტის მიხედვით, ახლა ამ ორი ორგანიზაციის Black Sea Arena-ს და თბილისის სახელმწიფო საკონცერტო დარბაზის შერწყმა უნდა მოხდეს და მათი მართვა ახალ ორგანიზაციას დაევალოს, რომელიც ამ მიზნით შეიქმნება და რომლის 100%-იანი წილის მფლობელიც სახელმწიფო იქნება. ახალი ორგანიზაციის შექმნის და არსებული დარბაზების შერწყმის პროცესს აქტივების ახალი მფლობელი, მთავრობის ადმინისტრაცია უზრუნველყოფს. თბილისის ფილარმონია აქტივების მართვის კომპანიიდან კულტურის სამინისტროს ბალანსზე 2022 წლის 27 მაისს გადავიდა. იქამდე, 2019 წლამდე კომპანიას შპს „ინტერნეიშენალ ივენთსი" მართავდა, რომელთან ხელშეკრულების მოშლის საფუძველი გახდა „ინტერნეიშენალ ივენთის“ მიერ ხელშეკრულებით აღებული ვალდებულებების შეუსრულებლობა, მათ შორის საკონცერტო დარბაზის განვითარების მიზნით ინვესტიციის ვადაგადაცილებით განხორციელება, წელიწადში არანაკლებ 100 ადგილობრივი და 5 საერთაშორისო ღონისძიების მოწყობის პირობის დარღვევა, მართვის საზღაურის გადაუხდელობა და სხვა. რაც შეეხება ბიძინა ივანიშვილის აშენებულ Black Sea Arena-ს, მას შემდეგ რაც 2016 წლის საპარლამენტო არჩევნებამდე სამი თვით ადრე კერძო მფლობელობიდან სახელმწიფოს საკუთრებაში გადავიდა, დარბაზს ეკონომიკის სამინისტრო მართავდა. 2022 წლის 16 მაისს კი მაშინდელმა პრემიერ-მინისტრმა, ირაკლი ღარიბაშვილმა მისი აქტივები და მართვის უფლება კულტურის სამინისტროს გადასცა. Black Sea Arena უკვე მეორე წელია სუბსიდირებული კონცერტების პროექტ Starring Georgia-ს ახორციელებს, რომლის ბიუჯეტიც 70 მილიონ ლარს შეადგენს. 2023 წლის ფინანსური ანგარიშის თანახმად, კონცერტების პროგრამა ზარალიანი იყო, რადგანაც მათი ორგანიზება 37 მილიონი ლარი დაჯდა, ხოლო ბილეთების რეალიზაციიდან მიღებული შემოსავალი 15 მილიონი ლარი, სპონსორობის შემოსავალი კი 3 მილიონი ლარი იყო. შესაბამისად, სახელმწიფო კომპანამ ჩადებული თანხის ნახევარის ამოღებაც ვერ შეძლო. 2024 წლის ზაფხულში ამ საკონცერტო დარბაზში დაგეგმილი იყო ბრიტანული ჯგუფის Massive Attack-ის კონცერტი, რომელმაც ვიზიტი საქართველოს ხელისუფლების მიმართ პროტესტის გამო გააუქმა. ...