სულ მცირე, ათი ადამიანი დაიღუპა და ხუთი დაიჭრა 17 აგვისტოს ისრაელის თავდასხმის შედეგად საცხოვრებელ შენობაზე ქალაქ ნაბატიეში, სამხრეთ ლიბანში. ლიბანის ჯანდაცვის უწყების ცნობით, დაღუპულები სირიელები არიან. მოკლულთა შორის ქალი და ორი ბავშვი არიან. ისრაელის სამხედროების განცხადებით, საჰაერო თავდასხმის სამიზნე იყო იარაღის საცავი, რომელსაც იყენებდნენ ჰეზბოლას მებრძოლები. Reuters-ის ცნობით, ბოლო კვირების განმავლობაში რეგიონში დაძაბულობა გაიზარდა მას შემდეგ, რაც სარაკეტო დარტყმისას, რომელშიც ჰეზბოლა დაადანაშაულეს, ისრაელის მიერ ოკუპირებულ გოლანის მაღლობებზე დაიღუპა 12 ბავშვი და მოზარდი. ისრაელმა საპასუხოდ ბეირუთის გარეუბანში განახორციელა თავდასხმა და მოკლა ჰეზბოლას მაღალი რანგის მეთაური. შარშან 7 ოქტომბერს ისრაელზე ჰამასის (აშშ-ში და ევროკავშირში ტერორისტულად შერაცხილი ორგანიზაცია) თავდასხმას, რასაც 1200 ადამიანი ემსხვერპლა, ხოლო 250 მძევლად აიყვანეს, ისრაელის სამხედრო - საჰაერო და სახმელეთო ოპერაცია მოჰყვა ღაზაში, სადაც ომის განმავალობაში 40 ათასზე მეტი ადამიანი დაიღუპა. ამ პერიოდში ჰეზბოლა, რომელიც ჰამასის მოკავშირეა, ისრაელის მიმართულებით ისვრის რაკეტებს, რასაც საპასუხო ცეცხლი ახლავს ისრაელის მხრიდან. ასევე ნახეთ ისრაელმა და ჰეზბოლამ ახალი იერიშები მიიტანეს საზღვრის მიმდებარე რაიონებში ასევე ნახეთ ისრაელის არმიამ განაცხადა, რომ ლიკვიდირებულია ჰამასის და ჰეზბოლას კიდევ ორი მეთაური ...