ახალი საბიუჯეტო გეგმის მიღების შემდეგ, გერმანიის მთავრობა, ეკონომიური მიზეზების გამო, აღარ გამოყოფს დამატებით თანხებს უკრაინის დასახმარებლად. ამის შესახებ იტყობინება გაზეთ Frankfurter Allgemeine-ის საკვირაო გამოცემა დოკუმენტებსა და წყაროებზე დაყრდნობით. ცნობით, იარაღის მიწოდება, უკვე დამტკიცებული, განხორციელდება, მაგრამ ახალ შეკვეთებზე ნებართვა არ იქნება გაცემული. შესაბამისი თხოვნა გამოთქვა ფინანსთა მინისტრმა, ქრისტიან ლინდნერმა წერილში, რომელიც 5 აგვისტოს გაეგზავნა თავდაცვის მინისტრს, ბორის პისტორიუსს და საგარეო საქმეთა მინისტრს, ანალენა ბერბოკს. წერილში საუბარია იმაზე, რომ ახალი დახმარება უნდა გამოიყოს მხოლოდ იმ შემთხვევაში, თუ ამ და მომავალი წლების საბიუჯეტო გეგმებში გარანტირებული იქნება მათი დაფინანსება. ამასთან, აუცილებელი იქნება "მაქსიმალური საზღვრების დაცვა". ბიუჯეტიდან უკრაინისთვის ახალი შესყიდვების მიზნით გამოყოფილი თანხების შეჩერება უკვე შევიდა ძალაში. ეს შესაძლოა, იმას ნიშნავდეს, რომ IRIS-T ტიპის საჰაერო თავდაცვის სისტემების უკვე დაპირებული მიწოდება ვეღარ დაფინანსდეს. მედიის ინფორმაციით, ფინანსთა მინისტრი, ქრისტიან ლინდნერი არ ელის უკრაინისთვის იარაღის მიწოდების დაუყოვნებლივ შეჩერებას. გერმანიის ბიუჯეტის ნაცვლად, თანხები გამოყოფილი იქნება გაყინული რუსული აქტივებიდან მიღებული სარგებლიდან. გერმანია აშშ-ის შემდეგ მეორე ქვეყანაა უკრაინისთვის დახმარების აღმოჩენის საქმეში. აშშ-ის მთავრობის მონაცემებით, დასავლეთის ქვეყნებში დაახლოებით 280 მილიარდი დოლარი იყო გაყინული, აქედან 210 მილიარდი - ევროკავშირში. ივნისში, G7-ის სამიტის დროს, მიღებული იქნა გადაწყვეტილება, გაყინული რუსული აქტივების მოგებიდან უკრაინისთვის 50 მილიარდი დოლარის ოდენობის კრედიტების გამოყოფის შესახებ. თუმცა, ჯერჯერობით უცნობია, როდის იქნება G7-ის გადაწყვეტილება მთლიანად შესრულებული. ევროკავშირმა ივლისში უკვე გადაურიცხა უკრაინას პირველი ნაწილი მილიარდ ნახევარი ევროს ოდენობით. ასევე ნახეთ “ვუთხარი, ეს არ გააკეთო-მეთქი” - ტრამპი ამტკიცებს, რომ უკრაინაში ომს დაასრულებს ასევე ნახეთ გერმანია 10 მილიონ ევროს გამოყოფს კიევში ბავშვთა საავადმყოფოს აღდგენისთვის ...