ისრაელი რთულ მოლაპარაკებებს აწარმოებს ღაზიდან მძევლების დაბრუნების შესახებ, მაგრამ ამავე დროს, იცავს საკუთარი უსაფრთხოებისთვის სასიცოცხლოდ საჭირო პრინციპებს, - განაცხადა ისრაელის პრემიერ-მინისტრმა ბენიამინ ნეთანიაჰუმ 18 აგვისტოს, მინისტრთა კაბინეტის სხდომის დასაწყისში. „არის საკითხები, რომელთა მიმართ შეგვიძლია ვიყოთ მოქნილი, მაგრამ არის საკითხები, რომელთა მიმართ ვერ ვიქნებით მოქნილი და დაჟინებით მოვითხოვთ მათ. ძალიან კარგად ვიცით მათი ერთმანეთისგან გარჩევა,“, - თქვა ნეთანიაჰუმ და დასძინა, რომ ჰამასი (აშშ-სა და ევროკავშირში ტერორისტულ დაჯგუფებადაა გამოცხადებული.) „სიჯიუტეს“ ავლენს ცეცხლის შეწყვეტის შესახებ მოლაპარაკებისას. ნეთანიაჰუ ყველას მოუწოდებს, გააძლიერონ ზეწოლა ჰამასზე მომავალი კვირის მოლაპარაკების წინ. ბოლო დღეებში გაძლიერდა დიპლომატიური მცდელობები ისრაელსა და ჰამასს შორის კონფლიქტის შესაჩერებლად და ღაზაში მყოფი მძევლების დაბრუნების შესახებ შეთანხმების მისაღწევად. ისრაელში 18 აგვისტოს ჩადის აშშ-ის სახელმწიფო მდივანი ენტონი ბლინკენი. მოლაპარაკებები აშშ-ის, ეგვიპტისა და კატარის შუამავლობით, ამ კვირაში გაგრძელდება კაიროში. გასულ კვირაში დოჰაში ორდღიანი შეხვედრა გაიმართა. ამერიკელი დიპლომატები ოპტიმისტურად არიან განწყობილი, მაგრამ აცხადებენ, რომ ბევრი სამუშაოა ჩასატარებელი. ასევე ნახეთ აშშ-ის წარმომადგენელი: შუამავლები ღაზაში შეთანხმებისთვის წინასწარ ემზადებიან. ღაზაში საჰაერო დარტყმას 18 ადამიანი ემსხვერპლა ...