რუსეთის ხელისუფლებამ ქვეყნის „დისკრედიტაციაში” დაადანაშაულა ჰოლივუდის ცნობილი მსახიობის, ჯორჯ კლუნის უფლებადამცველი არასამთავრობო ორგანიზაცია, „კლუნის ფონდი სამართლიანობისთვის“. რუსეთის გენერალური პროკურატურის მიერ დღეს, 19 აგვისტოს, გამოქვეყნებული გადაწყვეტილებით, „კლუნის ფონდი“ რუსეთის ტერიტორიაზე „არასასურველ ორგანიზაციად“ გამოცხადდა. მიზეზად დასახელებულია ის, რომ „ფონდი ჰოლივუდური გაქანებით“ მუშაობს რუსეთის დისკრედიტაციის მიზნით, აქტიურად უჭერს მხარს რუსეთიდან წასულ „ცრუპატრიოტებს და აკრძალული ექსტრემისტული გაერთიანებების და ტერორისტული ორგანიზაციების“ წევრებს, აქვს რუსეთის უმაღლესი ხელმძღვანელების სისხლისსამართლებრივი დევნის ინიციატივები და „საჯაროდ ახდენს უცხოეთის აგენტების და არასამთავრობო ორგანიზაციების შესახებ რუსული კანონმდებლობის ნეგატიური, ფსევდოექსპერტული შეფასებების ტირაჟირებას“. რუსეთის კანონმდებლობით, „არასასურველ ორგანიზაციებს“ ქვეყნის ტერიტორიაზე საქმიანობა ეკრძალებათ. დარღვევა როგორც ადმინისტრაციულ, ისე სისხლისსამართლებრივ პასუხისმგებლობას ითვალისწინებს. ჯორჯ კლუნიმ ცოლთან, იურისტ ამალი კლუნისთან ერთად 2016 წელს ნიუ-იორკში დააფუძნა ფონდი, რომელიც მსოფლიოს 40-ზე მეტ ქვეყანაში უფასო იურიდიულ დახმარებას უწევს ადამიანის უფლებათა დარღვევის მსხვერპლთ. 2022 წელს, უკრაინაში რუსეთის ფართომასშტაბიანი შეჭრის შემდეგ, „კლუნის ფონდმა“ დაიწყო ომის შესაძლო დანაშაულთა გამოძიებაც და რუსი მაღალჩინოსნების წინააღმდეგ არაერთი სარჩელი მოამზადა. ...