აშშ-ის სახელმწიფო მდივანი ენტონი ბლინკენი ახლო აღმოსავლეთში განხორციელებული ტურნეს განმავლობაში შეეცადა დაეჩქარებინა ღაზაში ცეცხლის შეწყვეტის შესახებ შეთანხმების მიღწევა, თუმცა რეგიონი ისრაელსა და ჰამასს შორის შეთანხმების გამოკვეთის გარეშე დატოვა. ბლინკენი და ეგვიპტისა და კატარის წარმომადგენელი შუამავლები იმედებს ამყარებენ აშშ-ის მიერ შემუშავებულ ე.წ. "ხიდის შეთანხმებაზე", რომელიც მიზნად ისახავს ორ მხარეს შორის უთანხმოებების შემცირებას უკვე 10 თვის განმავლობაში მიმდინარე ომში, თუმცა მოლაპარაკებები გასულ კვირაში ისე შეჩერდა, რომ გარღვევის მიღწევა ვერ მოხერხდა. შეთანხმება "უნდა გაფორმდეს, და უნდა გაფორმდეს შემდეგ დღეებში, და ჩვენ ყველაფერს გავაკეთებთ საიმისოდ, რომ შეთანხმება დასრულდეს", - უთხრა ბლინკენმა ჟურნალისტებს დოჰაში, ვაშინგტონში გაფრენამდე. სამშაბათს ბლინკენი ეგვიპტეში პრეზიდენტ აბდელ-ფატა ელ-სისისთან შესახვედრად ჩავიდა, შემდეგ კი კატარში განახორციელა ვიზიტი. მანამდე, ორშაბათს, ბლინკენი შეხვდა ისრაელის პრემიერ-მინისტრს, ბენიამინ ნეთანიაჰუს. შეხვედრის შემდეგ ბლინკენმა თქვა, რომ ისრაელი დათანხმდა შეთანხმებას და ჰამასსაც ამავე ნაბიჯის გადადგმისკენ მოუწოდა. ჰამასის წარმომადგენლებმა შეთანხმება ღიად არ უარყვეს, თუმცა განაცხადეს, რომ მასში შეცვლილია მანამდე შეთანხმებული პირობები. ჰამასი ევროკავშირისა და აშშ-ის მიერ აღიარებულია ტერორისტულ დაჯგუფებად. ასევე ნახეთ ბლინკენი აცხადებს, რომ ისრაელი დათანხმდა აშშ-ის მიერ მხარდაჭერილ შეთანხმებას ცეცხლის შეწყვეტაზე ...