მას შემდეგ, რაც მიმდინარე წელს განახლდა გასამხედროებული დაჯგუფება "ვაგნერი" და ახალი სახელიც დაირქვა - "აფრიკის კორპუსი" - კრემლის წარმომადგენლებმა, როგორც ჩანს, არ იციან, როგორი უნდა იყოს ან მისი შემდეგი ნაბიჯები, ან მისი როლი რუსეთის საერთაშორისო სტრატეგიაში, განაცხადეს ექსპერტებმა ვაშინგტონის ერთ-ერთ ანალიტიკურ ცენტრში 20 აგვისტოს. მასშტაბური განახლების მიუხედავად, ახლახან ფორმირებულ "აფრიკის კორპუსს" ძველი დაჯგუფებისგან, როგორც ჩანს, მხოლოდ სახელი განასხვავებს. უკრაინაში მიმდინარე ომი მისთვის რჩება მთავარ პრიორიტეტად, რაც მოიცავს ინტენსიურ თანამშრომლობას რუსეთის ოფიციალურ პირებთან. რაც შეეხება აფრიკას, დაჯგუფების დამოუკიდებლობაც და რეგიონში მათი ზუსტი როლიც კითხვის ქვეშაა - ამბობენ ექსპერტები. 23 აგვისტოს ერთი წელი შესრულდება ავიაკატასტროფიდან, რომელსაც შეეწირა "ვაგნერის" რამდენიმე მნიშვნელოვანი ფიგურა, მათ შორის დაჯგუფების ლიდერი ევგენი პრიგოჟინი. თვითმფრინავი მოსკოვის ჩრდილო-დასავლეთით, ტვერის რეგიონში ჩამოვარდა. რუსეთის ოფიციალურმა პირებმა ავიაკატასტროფა გამოაცხადეს უბედურ შემთხვევად, თუმცა ფართოდ გავრცელდა ვარაუდი, რომ ეს იყო გამიზნული ქმედება, რომელიც რუსეთის პრეზიდენტის, ვლადიმირ პუტინის დავალებით განხორციელდა. ავიაკატასტროფის შემდეგ დაჯგუფების მოქმედებებზე კონტროლი დაამყარა რუსეთის სამხედრო დაზვერვამ (GRU). თუმცა, როგორც 20 აგვისტოს ბრუკინგსის ინსტიტუტში თქვა პოლიტიკის ანალიტიკოსმა მარკ გალეოტიმ, GRU "ცდილობს ამუშაოს სტრუქტურა, რომელიცაა დიპლომატიური, კომერციული და სამხედრო ნაზავი", არადა მათ მხოლოდ სამხედრო სტრუქტურის ამუშავების უნარი აქვთ. ასევე ნახეთ „აფრიკული ხაფანგი“ - მალიში განადგურებული „ვაგნერის“ სამხედრო კოლონა და უკრაინის დაზვერვა ...