ამერიკის შეერთებული შტატების მიერ ახლო აღმოსავლეთში გაგზავნილი ავიამზიდი Abraham Lincoln-ი უკვე რეგიონშია. ინფორმაცია დღეს, 22 აგვისტოს, გაავრცელა შეერთებული შტატების შეიარაღებული ძალების ცენტრალურმა სარდლობამ. ახლო აღმოსავლეთი ამ სარდლობის პასუხისმგებლობის ზონაშია. ვაშინგტონმა რეგიონში თავისი სამხედრო ძალების გაზრდა ახლო აღმოსავლეთში ესკალაციის და ისრაელისადმი ირანის მუქარის გამო გადაწყვიტა. ავიამზიდი Abraham Lincoln-ი აღჭურვილია ავიაგამანადგურებლებით F-35C და F/A-18 Block III. ფლაგმან სამხედრო გემს თანხლებას უწევს 21-ე ესკადრა. три ახლო აღმოსავლეთში იმყოფება ამერიკული ავიამზიდი Theodore Roosevelt-იც. შეერთებული შტატების თავდაცვის მინისტრ ლოიდ ოსტინის ბრძანებით, ცენტრალური სარდლობის პასუხისმგებლობის ზონაში გაიგზავნება ფრთოსანი რაკეტებით აღჭურვილი ატომური წყალქვეშა ნავი USS Georgia-ც. ირანი ისრაელს საპასუხო ზომებით დაემუქრა მას შემდეგ, რაც 31 ივლისს თეირანში მოკლეს პალესტინელთა რადიკალური ისლამისტური მოძრაობა ჰამასის პოლიტიკური ბიუროს ხელმძღვანელი ისმაილ ჰანიე. ჰამასმა და ირანმა მკვლელობაში ისრაელი დაადანაშაულეს. ცოტა ხნით ადრე, ისრაელის არმიამ ბეირუთის გარეუბანში დაბომბა ლიბანში მოქმედი რადიკალური ისლამისტური ორგანიზაცია ჰეზბოლას პოზიციები და განაცხადა, რომ ლიკვიდირებულია მისი ერთ-ერთი სამხედრო მეთაური ფუად შუქრი. ჰეზბოლა ისრაელს შურისძიებით დაემუქრა. რამდენიმე დღით ადრე, 27 ივლისს, ისრაელმა ჰეზბოლა დაადანაშაულა გოლანის მაღლობებზე მდებარე ქალაქ მაჯდალ-შამსზე სარაკეტო შეტევაში, რომლის შედეგად სტადიონზე დაიღუპა 12 მოზარდი და ახალგაზრდა. ახლო აღმოსავლეთში ვითარება უკიდურესად დაიძაბა 2023 წლის ოქტომბრიდან, როცა ისრაელის სამხრეთზე ჰამასის თავდასხმის შედეგად 1200-მდე ადამიანი დაიღუპა და 250-ზე მეტი მძევლობაში აღმოჩნდა. თავდასხმას მოჰყვა ისრაელის მიერ ჰამასისთვის ომის გამოცხადება და უმწვავესი ჰუმანიტარული კრიზისის და დიდი მსხვერპლის გამომწვევი ფართომასშტაბიანი საბრძოლო მოქმედებები ღაზის სექტორში, სადაც პალესტინური მხარის ინფორმაციით, 40 000-მდე ადამიანია დაღუპული. ასევე ნახეთ ბლინკენმა დაასრულა ვიზიტი ახლო აღმოსავლეთში, ღაზის შეთანხმება კვლავ არ არის გამოკვეთილი ...