ისრაელის არმიის ტანკები სულ უფრო ღრმად შეიჭრნენ პალესტინელთა ტერიტორიაზე, ღაზის სექტორის ცენტრალურ და სამხრეთის რეგიონებში. აშშ-სა და ევროკავშირში ტერორისტულად მიჩნეულ დაჯგუფება ჰამასთან ბრძოლა გრძელდება. Reuters-ს მოჰყავს პალესტინელთა ჯანდაცვის უწყების წარმომადგენელთა ინფორმაცია, რომ ისრაელის დარტყმების შედეგად მთელ რეგიონში დაიღუპა 22 ადამიანი. Reuters-ი იუწყება, რომ თეთრი სახლის თანახმად, ვითარება კვლავ დაიძაბა რამდენიმე საათში მას მერე, რაც აშშ-ის პრეზიდენტმა ჯო ბაიდენმა ზეწოლა მოახდინა ისრაელის პრემიერ-მინისტრ ბენიამინ ნეთანიაჰუზე, რომ სწრაფად დაიდოს ღაზაში ცეცხლის შეწყვეტისა და მძევალთა გათავისუფლების შესახებ ხელშეკრულება. ცეცხლის შეწყვეტის შესახებ მოლაპარაკება შუამავლების გზით, რომელთა შორის აშშ-იცაა, თვეების განმავლობაში გაგრძელდა, მაგრამ დაპირისპირებული მხარეები - ისრაელი და ჰამასი - მტკიცედ დგანან თავიანთ მოთხოვნებზე. ექიმების თანახმად, ქალაქ ბეიტ-ლაჰიაში საცხოვრებელ სახლზე დარტყმის შედეგად 11 ადამიანი დაიღუპა, ხოლო ღაზის სექტორის ცენტრალურ არეალში, ალ-მაღაზის ბანაკში - ექვსი, მათ შორის - ერთი ჟურნალისტი. კიდევ ხუთი ადამიანი მოკლეს სხვადასხვა დარტყმის შედეგად სამხრეთში. ისრაელის არმიის განცხადებით, გასულ 24 საათში ისრაელის ჯარებმა გააქტიურეს ოპერაციები ღაზის ცენტრში, დეირ-ელ-ბალესა და ხან-იუნისში, სადაც გაანადგურეს ათეულობით სამხედრო წერტი, მიაკვლიეს რაკეტებს და დახოცეს მოწინააღმდეგის მებრძოლები. არსებული ცნობით, ბოლო დღეში რაფაჰში გაანადგურეს მოწინააღმდეგის 50 მებრძოლი. სატელეფონო საუბარი ბაიდენსა და ნეთანიაჰუს შორის გაიმართა 21 აგვისტოს, რეგიონში აშშ-ის სახელმწიფო მდივნის, ენტონი ბლინკენის უშედეგო მოგზაურობის შემდეგ. ჰამასს სურს დაიდოს ხელშეკრულება, რომელიც დაასრულებს ომს და გაათავისუფლებს ისრაელელ და უცხოელ მძევლებს ღაზაში იმ პალესტინელების გათავისუფლების სანაცვლოდ, რომლებიც ისრაელის ციხეებში არიან. ნეთანიაჰუ მიიჩნევს, რომ ცეცხლის შეწყვეტა მხოლოდ დროებითი უნდა იყოს, მძევლების და პატიმრების გასაცვლელად, და რომ ომი მხოლოდ მაშინ დასრულდება საბოლოდ, როცა ჰამასი დამარცხდება და ის საფრთხეს ვეღარ შეუქმნის ისრაელს. რეგიონში ვითარება უკიდურესად დაიძაბა 2023 წლის ოქტომბრიდან, როცა ისრაელის სამხრეთზე ჰამასის თავდასხმის შედეგად 1200-მდე ადამიანი დაიღუპა და 250-ზე მეტი მძევლობაში აღმოჩნდა. თავდასხმას მოჰყვა ისრაელის მიერ ჰამასისთვის ომის გამოცხადება და უმწვავესი ჰუმანიტარული კრიზისის და დიდი მსხვერპლის გამომწვევი ფართომასშტაბიანი საბრძოლო მოქმედებები ღაზის სექტორში, სადაც პალესტინური მხარის ინფორმაციით, 40 000-მდე ადამიანია დაღუპული. ასევე ნახეთ რამდენი პალესტინელი მოკლეს ღაზის სექტორში? ...