საბრძოლო მოქმედებებთან დაკავშირებით, სახიფათო ადგილები კურსკის რეგიონში 133 ათასზე მეტმა ადამიანმა დატოვა. ამის შესახებ ცნობა კურსკის ადგილობრივმა ხელისუფლებამ დღეს, 22 აგვისტოს, გაავრცელა. ამასთან, გუბერნატორ ალექსეი სმირნოვის თანახმად, საკუთარ სახლებში ჯერ კიდევ რჩება 19 ათასზე მეტი ადამიანი იმ რვა რაიონში, რომლებიც განსახლებისა და ევაკუაციის ზონაში მოხვდა. ამავე დროს, სმირნოვის სიტყვებიდან გამომდინარე, დარჩენილთა მხოლოდ მცირე ნაწილი, 12 ათასზე მეტი, იმყოფება ხელისუფლების მიერ მოწყობილ დროებით ბანაკებში. 3 ათასზე მეტი ადამიანი სხვა რეგიონებში გადაიყვანეს. გუბერნატორმა 22 აგვისტოს რუსეთის პრეზიდენტთან შეხვედრაზე აღნიშნა, რომ ამჟამად უკვე მოქმედებს 500-ზე მეტი დროებითი ბანაკი. გამოცემა „მედუზამ“ ყურადღება მიაქცია იმას, რომ რუსეთის პირველმა ვიცე-პრემიერმა დენის მანტუროვმა ვლადიმირ პუტინთან შეხვედრაზე სხვა რიცხვები მოიყვანა. მანტუროვის თქმით, "სახიფათო ადგილებიდან გამოსახლდა" 115 ათასი ადამიანი, რომელთათვისაც დროებითი განსახლებისა და კვების ობიექტები ფედერაციის 29 რეგიონში მოეწყო. ხუთშაბათის მდგომარეობით, როგორც BBC-ის რუსული სამსახური წერს, კურსკის რეგიონში, წინა ხაზზე მნიშვნელოვანი ცვლილებები გასული დღის განმავლობაში არ მომხდარა. მხარეები განაგრძობდნენ რეზერვების გადასროლას, გადაჯგუფებასა და პოზიციების გაძლიერებას. რუსული ტელეგრამის არხების ცნობით, უკრაინის შეიარაღებული ძალები აგრძელებდნენ თავდასხმებს რაიონულ ცენტრთან, კორენევოს ფლანგებზე. გავრცელებული ინფორმაციით, უკრაინული დანაყოფები შეეცადნენ სამხრეთ-დასავლეთიდან გაერღვიათ რუსეთის თავდაცვა სოფელ კომაროვკასთან და აღმოსავლეთიდან და ჩრდილო-აღმოსავლეთიდან - სოფელ ოლგოვკის მიმართულებით. სულ უფრო რთულდება მდინარე სეიმის სამხრეთით სასაზღვრო ზონის დამცველი რუსული ჯგუფის მდგომარეობა. მდინარეზე არსებული სამივე ხიდის მწყობრიდან გამოყვანის შემდეგ, რუსული დანაყოფები იზოლირებულნი აღმოჩნდნენ მდინარის მარცხენა სანაპიროზე, საიდანაც უკრაინის არმიის საცეცხლე ზემოქმედების გამო ჯერჯერობით ვერ ხერხდება საპონტონე გადასასვლელების აგება. ასევე ნახეთ ცნობილი გახდა, რა დაემართა კურსკის ოლქში რუსულ პონტონის ხიდს მდინარე სეიმზე რუსეთის არმიამ კურსკის ოლქში მდინარე სეიმზე საპონტონე გადასასვლელების მოწყობა დაიწყო მას შემდეგ, რაც უკრაინის შეიარაღებულმა ძალებმა ამ რეგიონში გაანადგურეს სამი სტაციონარული ხიდი. ხიდების ნგრევა ართულებს რუსეთის ჯარების მომარაგებას კურსკის რეგიონის შედარებით მცირე ნაწილში, რომელიც მოქცეულია მდინარე სეიმსა და რუსეთ-უკრაინის საზღვარს შორის. გარდა ამისა, ეს მკვეთრად ამცირებს იქ სავარაუდოდ დაჯგუფებული რუსეთის ჯარების უკან დახევის შესაძლებლობას და ასევე ართულებს მოსახლეობის ევაკუა...