ჩიკაგოში აშშ-ის დემოკრატიული პარტიის ეროვნული ყრილობის მეოთხე დღეს, აშშ-ის ვიცე-პრეზიდენტმა კამალა ჰარისმა ოფიციალურად მიიღო პარტიის საპრეზიდენტო კანდიდატობა. ის ყრილობაზე სიტყვით გამოვიდა. მისი სიტყვის მთავარი თემები იყო საზოგადოების ერთიანობა, წინსვლის აუცილებლობა. ჰარისის სიტყვაში აშშ-ის პრეზიდენტობის რესპუბლიკელი კანდიდატი დონალდ ტრამპი მოხსენიებული იყო, როგორც წარსულის სიმბოლო. სიტყვით გამოსვლა ჰარისმა თავისი ოჯახის შესახებ თხრობით დაიწყო - ინდოეთიდან და იამაიკიდან ემიგრირებული მშობლების შესახებ, რომლებმაც ცხოვრებისეული პრინციპები ჩაუნერგეს და რომ მისთვის ახლობელი და გასაგებია საშუალო ამერიკელების საზრუნავი. „პირობას ვდებ, ვიყო ყველა ამერიკელის პრეზიდენტი“, - თქვა ჰარისმა. მან დადო პირობა, რომ ქვეყნის ინტერესებს პარტიულ ინტერესზე მაღლა დააყენებს. კამალა ჰარისმა აუდიტორიას შეახსენა სან-ფრანცისკოსა და კალიფორნიაში პროკურორად მუშაობის შესახებ, როცა უწევდა დიდი კორპორაციების წნეხისგან სტუდენტების, დასაქმებულებისა და პენსიონერების ინტერესების დაცვა. ჰარისი თითოეულ ამერიკელს „შესაძლებლობების ეკონომიკის“ შექმნას დაჰპირდა. მან საფრთხეებზე გაამახვილა ყურადღება და ისაუბრა საფრთხეზე, რომელიც, მისი სიტყვებით, დონალდ ტრამპისგან მომდინარეობს. „ბევრ ურთიერთობაში ტრამპი არასერიოზული ადამიანია. მაგრამ თეთრ სახლში ტრამპის გამოჩენის შედეგები იქნება უკიდურესად სერიოზული“, - თქვა ჰარისმა და დაამატა, რომ ტრამპმა შეიძლება ქვეყანაში აბორტები აკრძალოს. საგარეო პოლიტიკაზე საუბრისას, ჰარისმა თქვა, რომ ტრამპმა წაახალისა პუტინის უკრაინაში შეჭრა. დემოკრატების პრეზიდენტობის კანდიდატმა განაცხადა, რომ მან გაუწია ორგანიზება ორმოცდაათზე მეტ ქვეყანას, დახმარებოდნენ უკრაინას. „პრეზიდენტად არჩევის შემთხვევაში, მტკიცედ დავუჭერ მხარს უკრაინას და ჩვენს ნატოელ პარტნიორებს“, - თქვა ჰარისმა ყრილობის მონაწილეთა აპლოდისმენტების ფონზე. მანვე გამოხატა მზადყოფნა, აღმოუჩინოს ისრაელს აუცილებელი დახმარება დაჯგუფება ჰამასის წინააღმდეგ ბრძოლაში (აშშ-სა და ევროკავშირში ტერორისტულ ორგანიზაციადაა აღიარებული), ამასთან ხაზი გაუსვა, რომ პალესტინელებს უნდა ჰქონდეთ უსაფრთხოების, თავისუფლებისა და თვითგამორკვევის უფლება. კამალა ჰარისის გამოსვლით დასრულდა დემოკრატების ოთხდღიანი ეროვნული ყრილობა, რომელიც ბაიდენის მიერ მეორე საპრეზიდენტო ვადით კენჭისყრაზე უარიდან ერთი თვის თავზე შედგა. ასევე ნახეთ ტიმ უოლზი ვიცე-პრეზიდენტობის ოფიციალური კანდიდატია - ეს ჩემთვის "ცხოვრების პატივია" საპრეზიდენტო არჩევნები აშშ-ში ნოემბერში გაიმართება. ...