რადიო თავისუფლების ჟურნალისტი ნასტასია არაბული პრესის თავისუფლების მხარდამჭერი Free Media Awards-ით დაჯილდოვდა. პრემია Free Media Awards-ი ორი ევროპული ფონდის, ნორვეგიული The Fritt Ord Foundation-ისა და გერმანული The Zeit Stiftung Bucerius-ის მიერ არის ინიციირებული და ყოველწლიურად გადაეცემა აღმოსავლეთ და ცენტრალური ევროპის ქვეყნებში მომუშავე მედიაგამოცემებს ან ჟურნალისტებს, რომლებიც განსაკუთრებულ როლს თამაშობენ დამოუკიდებელი მედიისა და სიტყვის თავისუფლების დაცვაში. 2024 წელს ნასტასია არაბულთან ერთად ამ პრემიის მფლობელები გახდნენ: მედია კოლექტივი Bihus.Info უკრაინიდან; ახალი ამბების გამოცემა Abzaz Media აზერბაიჯანიდან; უნგრელი ჟურნალისტი და რედაქტორი პანი საბოეჩი; ბელარუსი ჟურნალისტი ლარისა შირაკოვა; რუსი ჟურნალისტი და რედაქტორი მიხაილ აფანასიევი. თავისუფალი მედიის ჯილდო ამ დრომდე საქართველოში ცალკეულ ჟურნალისტს არ მიუღია. სხვადასხვა წლებში ამ პრემიით დაჯილდოვდნენ ონლაინგამოცემები Chai Khana, oc media, "ბათუმელები", "ნეტგაზეთი" და "ლიბერალი". დაჯილდოების ცერემონია 27 სექტემბერს ოსლოში, ნობელის ინსტიტუტში, გაიმართება. Free media Awards-ის ნომინანტებს საერთაშორისო ჟიური არჩევს. ...