ვოლგოგრადის ოლქის ქალაქ სუროვიკინოში პატიმრები აკონტროლებენ მკაცრი რეჟიმის N19 გამოსასწორებელ კოლონიას. იქ სადისციპლინო კომისიის სხდომა იმართებოდა. ვარაუდობენ, რომ არის მსხვერპლი. ტელეგრამის არხებზე ვრცელდება, სავარაუდოდ, კოლონიაში გადაღებული კადრები. ვიდეოებში ჩანს ოთხი ადამიანი, რომლებიც თავს მოიხსენიებენ „ისლამური სახელმწიფოს მოჯაჰედებად“. კადრებში ჩანს ოთხი მძევალიც. მათ სასჯელაღსრულების ფედერალური სამსახურის ფორმა აცვიათ. სამი მათგანი, სავარაუდოდ, ცოცხალი არაა, მეოთხე კისერშია დაჭრილი, თავდამსხმელები დანებით არიან შეიარაღებული. ტელეგრამის არხებზე ეჭვმიტანილთა ვინაობასაც ასახელებენ. წერენ, რომ მათგან ორი უზბეკეთის, სამი კი ტაჯიკეთის მოქალაქეა. ირწმუნებიან, რომ სამი ნარკოტიკების გასაღებისთვისაა მსჯავრდადებული, ერთი კი - ჯანმრთელობის განზრახ მძიმე დაზიანებისთვის. მათი ვინაობა ოფიციალურად არ დაუსახელებიათ. პატიმრების მიერ ციხის ხელში ჩაგდებას ადასტურებს რუსეთის სასჯელაღსრულების ფედერალური სამსახურის რეგიონული სამმართველო. უწყების განცხადებაში ნათქვამია, რომ მიმდინარეობს „მძევალთა გათავისუფლების ღონისძიება“, უცნობია მძევალთა ზუსტი რაოდენობა. გამოცემა "ბაზა" იტყობინება, რომ ციხის ხუთმა თანამშრომელმა, მათ შორის კოლონიის ხელმძღვანელმა, გაქცევა მოასწრო, თუმცა რეანიმაციულ განყოფილებაშია. სააგენტო "ინტერფაქსს" უყვებიან, რომ ანდრეი დევიატოვი გაუშვეს, რეანიმაციაში კი სამი სხვა ადამიანი იმყოფება. გამოცემები Life და "Сапа Кавказ" იუწყებიან, რომ კოლონიასთან სპეცდანიშნულების დანაყოფები არიან. გამოცემა "Сапа Кавказ-ი" კი თავის წყაროზე დაყრდნობით წერს, რომ პატიმრები 2 მლნ დოლარსა და ვერტმფრენს მოითხოვენ. მომხდართან დაკავშირებით სისხლის სამართლის საქმე აღიძრა ადამიანის მძევლად აყვანის მუხლით. ...