საფრანგეთის მედია ანონიმურ წყაროებზე დაყრდნობით იუწყება, რომ 24 აგვისტოს, საღამოს, პარიზის შემოგარენში, ბურჟეს აეროპორტში დააკავეს პაველ დუროვი, მილიარდერი და აპლიკაცია "ტელეგრამის" აღმასრულებელი დირექტორი. დუროვი თავისი კერძო თვითმფრინავით მგზავრობდა - წერს TF1 ვებსაიტზე და დასძენს, რომ მასზე გაცემული დაპატიმრების ორდერი ნაწილია წინასწარი საპოლიციო გამოძიებისა. მედიაში გავრცელებული ცნობებით, გამოძიება ფოკუსირებულია "ტელეგრამზე" მოდერატორების ნაკლებობაზე, რაც, პოლიციის აზრით, კრიმინალურ მოქმედებებს უხსნის გზას ამ საინტერნეტო შეტყობინებების ქსელში. სააგენტო "როიტერსი" წერს, რომ "ტელეგრამის" წარმომადგენლებმა ჯერჯერობით არ უპასუხეს მის თხოვნას კომენტარის გაკეთებაზე. განცხადებას არ აკეთებენ საფრანგეთის შინაგან საქმეთა სამინისტრო და პოლიცია. TF1-ის ცნობით, დუროვი აზერბაიჯანიდან ჩავიდა და ის ადგილობრივი დროით საღამოს 8 საათზე დააკავეს. დუბაიში განთავსებული "ტელეგრამი" დააფუძნა რუსეთში დაბადებულმა დუროვმა, რომელმაც რუსეთი 2014 წელს დატოვა - მას მერე, რაც არ დაემორჩილა ბრძანებას დახურულიყო ოპოზიციური ჯგუფები სოციალური მედიის მის პლატფორმაზე VK, რომელიც დუროვმა შემდგომში გაყიდა. დუროვი - რომელიც, "ფორბსის" შეფასებით 15.5 მილიარდ დოლარს ფლობს - ამბობდა, რომ ზოგიერთი ქვეყნის მთავრობა მასზე ზეწოლის განხორციელებას ცდილობდა, თუმცა აპლიკაცია, რომელსაც ამჟამად 900 მილიონი აქტიური მომხმარებელი ჰყავს, უნდა დარჩენილიყო "ნეიტრალურ პლატფორმად" და არა "გეოპოლიტიკურ მოთამაშედ". ...