„დღე გადაწყვეტილების მოგვიახლოვდა, დღე - გადარჩენის. დღეს ჩვენ საქმე არ გვაქვს ჩვეულებრივ არჩევნებთან... ჩვენი დღევანდელი არჩევანი ეგზისტენციალურია. ეს არჩევანი ქვეყნის ბედს მრავალი წლით განაპირობებს და ამიტომაც, როგორც პრეზიდენტს, მაქვს ჩემი სათქმელი. უნდათ დაგვარწმუნონ, რომ ეს იქნება არჩევანი ომსა და მშვიდობას შორის - ეს ტყუილია, რამეთუ არჩევნებით ომის საფრთხე ვერ აღიკვეთება... დღეს საქართველოში არავის უნდა ომი და არავინ ამზადებს. იზოლაცია, შიდა დაპირისპირება, პრიორიტეტების და მიზნების ბუნდოვანება და აღრევა კი ზრდის მტრის მადას - ანუ ომის საფრთხეს. სამაგიეროდ, მხნეობა, ერთიანობა, სიცხადე მოყვარესთან თუ მტერთან ყველაზე კარგი თავდაცვა არის ქვეყნის უსაფრთხოებისა. ის კი მართალია, უნდა მოვემზადოთ არჩევანისთვის, რომელიც იქნება რეფერენდუმის ტოლფასი: ევროპა თუ რუსეთი...“ - თქვა პრეზიდენტმა. ამ საპარლამენტო არჩევნების თარიღი კონსტიტუციით იყო განსაზღვრული, თუმცა აუცილებელი იყო, პრეზიდენტს განკარგულება გამოეცა. მომდევნო საპარლამენტო არჩევნები საქართველოში 2024 წლის 26 ოქტომბერს 5-პროცენტიანი ბარიერით ჩატარდება. იმისთვის, რომ ბარიერის გადალახვის პრობლემა არ შეჰქმნოდათ, პარტიების ნაწილმა არჩევნებში ერთიანი სიით მონაწილეობა გადაწყვიტა. ...