აშშ უკრაინის შეიარაღებულ ძალებს კვლავ არ აძლევს უფლებას, ამერიკული იარაღი გამოიყენოს დარტყმებისთვის რუსეთის ტერიტორიის სიღრმეში მდებარე სამიზნეებზე - ამის შესახებ 27 აგვისტოს გამართულ ბრიფინგზე განაცხადა პენტაგონის ოფიციალურმა წარმომადგენელმა, გენერალ-მაიორმა პატრიკ რაიდერმა, იუწყება "ამერიკის ხმა". "უკრაინელებს შეერთებული შტატების მიერ უსაფრთხოების სფეროში გაწეული დახმარების გამოყენება შეუძლიათ თავდაცვისთვის საზღვრის მეორე მხრიდან განხორციელებული თავდასხმებისგან. ანუ სხვა სიტყვებით - საპასუხო ცეცხლისთვის. მაგრამ რაც შეეხება გრძელი მასშტაბის დარტყმებს რუსეთის ტერიტორიის სიღრმეში, ჩვენი პოლიტიკა არ შეცვლილა", - აცხადებს რაიდერი. "ჩვენ რუსეთთან ომს არ ვაწარმოებთ. ჩვენ კონფლიქტს არ ველტვით. ჩვენ უბრალოდ დემოკრატიულ ქვეყანას ვუჭერთ მხარს... და [უკრაინელებს] ვაძლევთ საშუალებას, თავი დაიცვან", - თქვა პენტაგონის წარმომადგენელმა. ამჟამად უკრაინას უფლება აქვს, იმოქმედოს განსაზღვრული რადიუსის შიგნით, რათა აღკვეთოს რუსეთის არმიის შეტევები. უკრაინის პრეზიდენტმა ვოლოდიმირ ზელენსკიმ 26 აგვისტოს დასავლეთის ქვეყნებს კიდევ ერთხელ მოუწოდა, მოუხსნან უკრაინას შეზღუდვა გრძელი რადიუსის იარაღის გამოყენებაზე რუსეთის ტერიტორიის სიღრმეში. ზელენსკის განცხადებას წინ უძღოდა რუსეთის მხრიდან უკრაინაზე განხორციელებული მასშტაბური თავდასხმა, ასზე მეტი რაკეტის და ასამდე დრონის გამოყენებით. გამოცემა Politico წყაროებზე დაყრდნობით იუწყება, რომ კიევი აპირებს ვაშინგტონს გადასცეს სია რუსეთში განთავსებული პოტენციური სამიზნეებისა, თუკი თეთრი სახლი მოხსნის შეზღუდვას ამერიკული იარაღის გამოყენებაზე. ასევე ნახეთ ზელენსკი მოკავშირეებს "გადამწყვეტი მოქმედებისკენ" მოუწოდებს რუსეთის მხრიდან მასშტაბური შეტევის შემდეგ ...