ზაფხულის შესვენების შემდეგ, ბრიუსელში პირველ შეხვედრას მართავენ ევროკავშირის წევრი ქვეყნების საგარეო საქმეთა მინისტრები. შეხვედრის მთავარი თემა უკრაინაა. ევროკავშირის საგარეო-პოლიტიკურმა ხელმძღვანელმა ჟოზეპ ბორელმა შეხვედრის წინ წამოაყენა წინადადება, სანქციები დაუწესდეს ისრაელის მთავრობის წევრებს - ისრაელის ფინანსთა მინისტრ ბაცალელ სმოტრიჩს და პოლიციის უფროს იტამარ ბენ-გვირს. გერმანული მედია იტყობინება, რომ dpa-ს ეს ინფორმაცია საგარეო საქმეთა მინისტრების შეხვედრის წინ, 29 აგვისტოს, დაუდასტურეს ევროკავშირის მოხელეებმა. ორივე ისრაელელი მემარჯვენე ექსტრემისტი პოლიტიკოსის მოთხოვნებმა, რომლებიც პალესტინელთა მიმართ რადიკალურ ქმედებას შეეხება, აღშფოთება გამოიწვია. მათი მოთხოვნით, ღაზის სექტორის მოსახლეობას ჰუმანიტარული დახმარების მიწოდება უნდა შეუწყდეს იმ მიზნით, რომ აიძულონ ჰამასი (აშშ-სა და ევროკავშირში ტერორისტულად მიჩნეული ორგანიზაცია), დანებდეს, თუნდაც ამას ორი მილიონი ადამიანის შიმშილობას მოჰყვეს. ამას გარდა, ორივე მომხრეა პალესტინელთა ოკუპირებულ ტერიტორიებზე - იორდანეს დასავლეთ ნაპირზე დასახლელების მშენებლობის პოლიტიკისა, რასაც გაეროს უზენაესი სასამართლო უკანონოდ მიიჩნევს. ბორელის წინადადებით, სანქციები სმოტრიჩისა და ბენ-გვირის მიმართ შეიძლება დაწესდეს სიძულვილის გაღვივების და ადამიანის უფლებების დარღვევის გამო. შესაძლებელი სანქციები გულისხმობს მათთვის ევროპის კავშირის ქვენებში მოგზაურობის აკრძალვას და ევროკავშირის ტერიტორიაზე არსებული მათი ქონების გაყინვას. არ არის ცნობილი, თუ საერთოდ მოხდა, როდის განხორციელდება ბორელის წინადადება. ევროკავშირის ნორმით, სანქციებს ყველა წევრი უნდა მიემხროს. გერმანია, ჩეხეთი და უნგრეთი ისრაელის მიმართ სანქციებს დღემდე კრიტიკულად უყურებდნენ. ერთ-ერთი არგუმენტი სანქციების წინააღმდეგ არის ის, რომ ამით შეიძლება ზიანი მიადგეს ცეცხლის შეწყვეტის შესახებ მიმდინარე მოლაპარაკებებს. დღემდე ევროკავშირმა სანქციები დაუწესა მხოლოდ რადიკალურ ისრაელელ ახალმოსახლეებს პალესტინელთა ტერიტორიებზე და მათ სტრუქტურებს. ისრაელის საგარეო საქმეთა მინისტრმა ისრაელ კაცმა X-ით გაავრცელა განცხადება, რომ "დაუღალავად ვმუშაობთ ევროპელ მოკავშირეებთან ერთად, რათა ავირიდოთ საგარეო საქმეთა მინისტრების ხვალინდელ შეხვედრაზე ისრაელის მიმართ მტრული გადაწყვეტილება, რომელსაც ესწრაფვიან ისრაელის მიმართ მტრული ელემენტები”. ბრიუსელის შეხვედრაზე მთავარი თემა იქნება უკრაინა. შეხვედრას სტუმრის სტატუსით დაესწრება უკრაინის საგარეო საქმეთა მინისტრი დმიტრო კულება. იგი შეეცდება, კვლავ მოითხოვოს დასავლელი მოკავშირეებისგან, რომ კიევს შორი მოქმედების რაკეტების რუსეთის ტერიტორიაზე თავდასხმისთვის გამოყენების უფლება მისცენ. ასევე ნახეთ ისრაელის პრეზიდენტმა, თეთრმა ს...