საქართველოს საკონსტიტუციო სასამართლოში მიმდინარეობს პლენუმის განმწესრიგებელი სხდომა „აგენტების კანონის“ საქმეზე. მოსარჩელეები არიან პრეზიდენტი, 122 არასამთავრობო და მედიაორგანიზაცია, 38 ოპოზიციონერი დეპუტატი და ორი მედიაორგანიზაცია: „სტუდია მონიტორი“ და „საინფორმაციო ცენტრების ქსელი“. საკონსტიტუციო სასამართლოს გადაწყვეტილების მიღებამდე, ოთხივე მოსარჩელე მოითხოვს „აგენტების კანონის“ მოქმედების შეჩერებას. პროცესი პრეზიდენტის შუამდგომლობის განხილვით დაიწყო. შეკითხვაზე, რა შედეგს გამოიღებს კანონის მოქმედების შეჩერება, პრეზიდენტის წარმომადგენელმა გიორგი ბურჯანაძემ უპასუხა, რომ თუკი ძალაში დარჩება, კანონი გამოუსწორებელ შედეგს გამოიღებს. „უფლებების ნაწილში, ჩვენ გვჯერა, რომ ეს ნორმა სრულიად არაკონსტიტუციურია და მისი გაუქმება მოხდება, მაგრამ გაუქმებამდე რა ზიანიც ორგანიზაციებს მიადგება, ეს იქნება გამოუსწორებელი... მიგვაჩნია, რომ შეჩერება ახლა აუცილებელია იმისთვის, რომ ხვალ და ზეგ, როდესაც არაკონსტიტუციურად ცნობა მოხდება, გამოუსწორებელი ზიანი არ დადგეს. ჩემზე კარგად იცით, საკონსტიტუციო სასამართლოს გადატვირთულობის გამო რა ვადები გჭირდებათ საქმის განსახილველად. ამ თვალსაზრისით, არსებობს ობიექტური მდგომარეობა და აქედან გამომდინარე, ეს რისკი რომ არ დაგვიდგეს, ჩვენ გვჯერა, რომ შეჩერება იქნება გამოუსწორებელი ზიანის თავიდან ასაცილებლად“, - თქვა ბურჯანაძემ. რაც შეეხება პრეზიდენტის სარჩელში მოცემულ ძირითად საკითხს, რომლის თანახმად, „აგენტების კანონი“ ეწინააღმდეგება კონსტიტუციის 78-ე მუხლს (კონსტიტუციურმა ორგანოებმა თავიანთი უფლებამოსილების ფარგლებში მიიღონ ყველა ზომა ევროპის კავშირსა და ჩრდილოატლანტიკური ხელშეკრულების ორგანიზაციაში საქართველოს სრული ინტეგრაციის უზრუნველსაყოფად), ბურჯანაძის თქმით, ამ შემთხვევაში კანონის მოქმედების შეჩერება აღადგენს იმ სტატუს-კვოს, რომელიც ევროინტეგრაციის მიმართულებით კანონის ინიციირებამდე იყო . ამასთან, დროის გაწელვის შემთხვევაში, ბურჯანაძე საერთაშორისო კონიუნქტურის ცვლილების საფრთხეს ხედავს. „ევროკავშირთან გაწევრებაზე მოლაპარაკებების დასაწყებად, საქართველოს ცხრა პირობა აქვს შესასრულებელი. ამ ცხრის მიღმა, ეს კანონი არის აქილევსის ქუსლი, მთავარი გამოწვევა, რომლის არსებობა ბუნებრივად გამორიცხავს შემდეგ პროცესს... პირობითად, თუკი ამ საქმის განხილვა გაგრძელდა თვეებისა და წლების განმავლობაში და მიიღო საკონსტიტუციო სასამართლომ არაკონსტიტუციურად ცნობის გადაწყვეტილება, შემდგომ პოლიტიკური მდგენელი [ევროინტეგრაციისთვის] შეიძლება შეცვლილი იყოს, - აღნიშნა მან და დაამატა, - 78 მუხლს აქვს ორი განზომილება: პოლიტიკური და სამართლებრივი. მას ტექნიკურად ვერ შევხედავთ. პოლიტიკური კონიუნქტურა შეიძლება შეიცვალოს...“ ასევე ნახეთ ცნობილია, ვინ იმუშავ...