ავსტრიელი ბიოლოგების გუნდი მესამე კვირაა მუშაობს გადაშენების პირას მყოფ ფრინველებთან, ივეოსებთან და ასწავლის მათ წინაპრების მარშრუტზე მიგრაციის უნარებს - ცენტრალური ევროპიდან სამხრეთ ევროპისკენ. ბიოლოგები, იოჰანეს ფრიცი და ბარბარა შტაინინგერი ყოველდღიურად სხდებიან მოტოპარაპლანში, მათან ერთად დაფრინავენ და გზის გაგრძელებაში ეხმარებიან. три 30 აგვისტოს, ბიოლოგებმა და ფრინველებმა 100 კილომეტრზე მეტი გაიფრინეს. ესპანეთის სამხრეთ ნაწილში ისინი ოქტომბრის დასაწყისისთვის უნდა ჩაფრინდნენ. მელოტი ივეოსები ცენტრალური ევროპის ტერიტორიაზე 300 წლის წინ, მათზე ნადირობის შემდეგ გადაშენდნენ. ბოლო ორი ათწლეულია, ბიოლოგებმა შეძლეს ფრინველების კვლავ გაზრდა, თუმცა, მათი ბუნებაში დაბრუნება ამ დრომდე ვერ ხერხდება. ფრინველებმა არ იციან, საით უნდა გაფრინდნენ გამოსაზამთრებლად, იფანტებიან სხვადასხვა ქვეყანაში და იხოცებიან. ახლა მეცნიერებს ახალშობილი ივეოსები აჰყავთ ზოოპარკიდან, გადაჰყავთ ისინი ვოლიერებში, სადაც მათ კონკრეტული ადამიანი უვლის. პატარა ივეოსები იმახსოვრებენ „მიმღებ მშობელს“, მათ ენდობიან და მზად არიან, რომ მას მიგრაციის მარშრუტზე გაჰყვნენ, - წერს The Guardian-ი. ბარბარა შტაინინგერი ამბობს, რომ იქცევა, როგორც „ფრინველის დედა“ და თითოეულ მათგანთან ინდივიდუალურ ურთიერთობას ამყარებს. გამოსაზამთრებელ ტერიტორიაზე ჩაფრენის შემდეგ, ფრინველები უკვე დამოუკიდებლები ხდებიან, მრავლდებიან და თავად ასწავლიან მომავალ თაობას მიგრირებას. ...