ისრაელის სამხედროებმა ღაზის სექტორში დაჯგუფება ჰამასის (აღიარებულია ტერორისტულ ორგანიზაციად შეერთებულ შტატებსა და ევროკავშირში) მებრძოლების მიერ, 2023 წლის 7 ოქტომბერს გატაცებული ექვსი მძევლის ცხედრები იპოვეს. ესენი არიან: ედენ იერუშალმი, ორი დანინო, კარმელ გატი, გერშ გოლდბერგ-პოლინი, ალმოგ სარუსი და ალექსანდრ ლობანოვი. ამ უკანასკნელს ისრაელის გარდა, რუსეთის მოქალაქეობაც ჰქონდა. ისრაელის თავდაცვის ძალების (IDF) პრესსამსახური იუწყება, რომ ექვსივე მათგანი სასტიკად მოკლეს ჰამასის მებრძოლებმა რამდენიმე დღით ადრე, სანამ ისრაელის სამხედროები გვირაბს მიაღწევდნენ. ცხედრები იპოვეს მიწისქვეშა გვირაბში, ღაზის სექტორის სამხრეთით, იმ ადგილიდან არც თუ ისე შორს, საიდანაც 27 აგვისტოს მძევალი ყაედ ფარჰან ალ-ყადი გაათავისუფლეს. უცნობია, იყო თუ არა ალ-ყადის გათავისუფლება დაკავშირებული ექვსი მძევლის სიკვდილთან. ვრცელდება ინფორმაცია, რომ „ბოევიკებმა“ ხუთი ადამიანი 7 ოქტომბერს ნოვას მუსიკალური ფესტივალიდან გაიტაცეს, კიდევ ერთი კი კიბუც ბერიდან. მანამდე 30 აგვისტოს, ისრაელის თავდაცვის ძალებმა ღაზის სექტორიდან დააბრუნეს 34-დან 80 წლამდე ასაკის ექვსი მძევლის ცხედრები. ისინი აშშ-სა და ევროკავშირში ტერორისტულ ორგანიზაციად აღიარებულმა ჰამასმა აიყვანა მძევლებად შარშან 7 ოქტომბერს სამხრეთ ისრაელზე თავდასხმის შემდეგ. ასევე ნახეთ ისრაელის თავდაცვის ძალებმა ღაზის სექტორიდან დააბრუნეს ექვსი მძევლის ცხედრები ისრაელის ხელისუფლების ინფორმაციით, ჰამასის ტყვეობაში 109 ადამიანი რჩება. ვარაუდობენ, რომ მათი მესამედი აღარ არის ცოცხალი. შარშან ოქტომბერში სამხრეთ ისრაელზე ჰამასის თავდასხმის დროს 1200-ზე მეტი ადამიანი დაიღუპა. 250-ზე მეტი ჯიჰადისტებმა გაიტაცეს და ღაზაში გადაიყვანეს. შარშან ნოემბერში ცეცხლის შეწყვეტის დროს 105 მძევალი გაათავისუფლეს. ისინი გაცვალეს პალესტინელ პატიმრებში, რომლებიც ისრაელის ციხეებში იხდიდნენ სასჯელს. ივნისის დასაწყისში ისრაელის არმიამ და უსაფრთხოების სამსახურებმა ოთხი მძევალი გაათავისუფლეს. 7 ოქტომბრის ტერაქტის შემდეგ ისრაელის მიერ ღაზის სექტორში დაწყებული სამხედრო ოპერაციის შედეგად დაიღუპა 40 ათასი პალესტინელი, უმრავლესობა - ქალები და ბავშვები. ამის შესახებ ინფორმაციას ავრცელებს ღაზის სექტორის ჯანდაცვის უწყება. ასევე ნახეთ რამდენი პალესტინელი მოკლეს ღაზის სექტორში? ...