სამხრეთ კორეის პოლიციამ Telegram Corporation-ის წინააღმდეგ წინასწარი გამოძიება დაიწყო. კომპანია ეჭვმიტანილია პორნოგრაფიული „დიპფეიკების“ გავრცელებაში. ამის შესახებ სააგენტო Yonhap-ი იტყობინება. გამოძიების ეროვნული ბიუროს ხელმძღვანელმა უ ჩონ სუმ განაცხადა, რომ მსგავსი გამოძიება ქვეყანაში პირველად ტარდება და ის საფრანგეთის ხელისუფლების ამასწინანდელი მოქმედებების ანალოგიურია. გამოცემის თანახმად, აგვისტოს ბოლოს სულ რაღაც ოთხ დღეში მიღებულია 88 საჩივარი, რომლებიც დაკავშირებულია „დიპფეიკებთან“, გამოვლენილია 24 ეჭვმიტანილი. პოლიცია ასევე იძიებს ტელეგრამის რვა ბოტის საქმიანობას, რომლებიც ავტომატურად ქმნიან „დიპფეიკებს“, ასევე ჯგუფებს, რომლებიც ავრცელებენ ამ მასალებს. აღნიშნულია, რომ გამოძიება რთულია, რადგან ტელეგრამი არ იძლევა ისეთ მონაცემებს, როგორიცაა ინფორმაცია ანგარიშის შესახებ. კორეელი გამომძიებლები ითანამშრომლებენ საფრანგეთის საგამოძიებო ორგანოებთან და სხვადასხვა საერთაშორისო ორგანიზაციასთან. საინტერნეტო შეტყობინებების აპლიკაციის, „ტელეგრამის“ თანადამფუძნებელი პაველ დუროვი 24 აგვისტოს საღამოს დააკავეს პარიზის ლე ბურჟეს აეროპორტში. ის დაკითხეს და წინასწარი დაკავების საკანში მოათავსეს. ასევე ნახეთ ბავშვთა პორნოგრაფიის და კრიმინალის ხელშეწყობა - რას ედავება პაველ დუროვს საფრანგეთი საფრანგეთში დუროვისთვის წაყენებული ექვსი ბრალდებიდან ერთ-ერთია ხელისუფლებასთან თანამშრომლობაზე უარი. ბრალდებების უმეტესობა ემყარება იმ ფაქტს, რომ „ტელეგრამის“ მესინჯერის გამოყენებით ჩადენილია მძიმე დანაშაულები. დუროვის ადვოკატმა ყველა ბრალდებას აბსურდული უწოდა. ოთხი დღის შემდეგ დუროვი გაათავისუფლეს სასამართლოს მეთვალყურეობით და ხუთი მილიონი ევრო გირაო დაუწესეს. გარდა ამისა, დუროვი ვალდებულია კვირაში ორჯერ გამოცხადდეს პოლიციის განყოფილებაში, მას ეკრძალება საფრანგეთის დატოვება. დუროვმა, რომელიც რუსული წარმოშობისაა, 2021 წელს მიიღო საფრანგეთის მოქალაქეობა. ბოლო დროს ის ძირითადად ცხოვრობდა არაბეთის გაერთიანებულ საამიროებში, სადაც ტელეგრამის ოფისია განთავსებული. ბიზნესმენმა დაახლოებით 10 წლის წინ დატოვა რუსეთი. ...