კრემლი 2 სექტემბერს აცხადებს, რომ რუსეთის პრეზიდენტი, ვლადიმირ პუტინი სახელმწიფო ვიზიტით ჩავიდა მონღოლეთში - ქვეყანაში, რომელიც მდებარეობს რუსეთისა და ჩინეთის დამაკავშირებელი, ახალი, დაგეგმილი გაზსადენის მარშრუტზე. რუსეთი წლებია აწარმოებს მოლაპარაკებებს გაზსადენის აშენებაზე - ამ ახალმა გაზსადენმა წელიწადში 50 მილიარდი კუბური მეტრი ბუნებრივი აირი უნდა გადაიტანოს რუსეთის იამალის რეგიონიდან ჩინეთში, მონღოლეთის გავლით. ეს პროექტი, სახელად "ციმბირის ძალა-2", წარმოადგენს ნაწილს რუსეთის სტრატეგიისა კომპენსაცია გამონახოს ევროპის ბაზრებისთვის, რომლებიც რუსეთის გაზმა დაკარგა უკრაინაში მოსკოვის შეჭრის პასუხად. ეს პროექტი არის მემკვიდრე არსებული, იმავე სახელის მქონე გაზსადენისა, რომელიც უკვე აწვდის რუსულ გაზს ჩინეთს და რომლის მოცულობამაც, გეგმის მიხედვით, 2025 წელს 38 კუბურ მეტრს უნდა მიაღწიოს. ამ ახალ წამოწყებას რამდენიმე ფაქტორი უქმნის წინაღობას - მათ შორის გაზის ფასის საკითხი. თუმცა, როგორც პუტინი თავისი ვიზიტის წინ აცხადებდა, მოსამზადებელი სამუშაოები, მათ შორის საინჟინრო კვლევები, უკვე მიმდინარეობს. სამშაბათს პუტინი მონღოლეთის პრეზიდენტთან, უხნაგინ ხურელსუხთან გამართავს შეხვედრას. მონღოლეთს გასულ კვირაში უკრაინამ მოუწოდა პუტინი დააპატიმროს სისხლის სამართლის საერთაშორისო სასამართლოს (ICC) ორდერის საფუძველზე. რუსეთის პრეზიდენტს ბრალად სდებენ ასობით უკრაინელი ბავშვის უკანონოდ გაყვანაში ტერიტორიებზე, რომლებსაც კიევი არ აკონტროლებს. ულან-ბატორს პუტინის დაპატიმრებისკენ მოუწოდა საერთაშორისო უფლებადამცველმა ორგანიზაციამ, Human Rights Watch-მაც. დაპატიმრების ორდერი სასამართლოს 124 წევრ ქვეყანას - მათ შორის მონღოლეთს - ავალდებულებს პუტინის დაპატიმრებას და მის გადაცემას ჰააგისთვის, თუკი ის მათ ტერიტორიაზე შევა. კითხვას, ჰქონდათ თუ არა მონღოლეთის ხელისუფლებასთან მსჯელობა ICC-ის ორდერზე, კრემლის პრესმდივანმა, დმიტრი პესკოვმა გასულ კვირაში უპასუხა, რომ "დეტალურად იქნა განხილული ვიზიტის ყველა ასპექტი". ასევე ნახეთ უფლებადამცველები მონღოლეთს პუტინის დაპატიმრებისკენ მოუწოდებენ ...