ევროკავშირის ლიდერებმა გააფრთხილეს სერბეთი, რომ მოსკოვთან კავშირების შენარჩუნება რუსეთის მიერ უკრაინაში შეჭრის დროს, შეუთავსებელია ევროპული ბლოკის ფასეულობებთან და ევროკავშირში გაწევრიანების პროცესთან. ევროკავშირში გაწევრიანების კანდიდატი ქვეყნის გაფრთხილება მოჰყვა გამოცხადებას, რომ სერბეთის ვიცე-პრემიერი, ალექსანდრ ვულინი რუსეთის პრეზიდენტ ვლადიმირ პუტინთან ამ კვირაში, ვლადივოსტოკში, ეკონომიკური ფორუმის ფარგლებში შეხვედრას აპირებს. Პუტინის ადმინისტრაციის ცნობით, ის 4 სექტემბერს შეხვდება ვულინს და იმავე დღეს აწარმოებს მოლაპარაკებებს ჩინეთისა და მალაიზიის ოფიციალურ პირებთან. "ევროპის კავშირმა სრულიად ნათლად განუცხადა თავის პარტნიორებს, რომ რუსეთთან ურთიერთობა ვეღარ იქნება ჩვეულებრივი, მისი გაუმართლებელი და აგრესიული ომის შემდეგ უკრაინის წინააღმდეგ", - განაცხადეს ბრიუსელში რადიოთავისუფლების ბალკანური სამსახურის შეკითხვის საპასუხოდ. ბრიუსელში ხაზგასმით აღნიშნეს ასევე, რომ "ევროკავშირს სურს, რომ ჰქონდეს იმედი ყველა კანდიდატი ქვეყნის, როგორც სანდო ევროპული პარტნიორებისა, რომელთაც უსაფრთხოების საკითხებში საერთო პრინციპები და ფასეულობები აქვთ. სერბეთის პრემიერ-მინისტრმა, მილოშ ვუჩევიჩმა, რადიო თავისუფლების ბალკანურ სამსახურს განუცხადა, რომ მედიაში ნახა განცხადება შეხვედრის შესახებ, მაგრამ, მისი თქმით, "არაფერი ეპოქალური ან რაღაც საშინელი არ არის ვულინისა და პუტინის შეხვედრაში რუსეთში". "ჩვენ არ გაგვიწყვეტია დიპლომატიური ურთიერთობები რუსეთთან, არავის ეკრძალება შეხვედრა მის წარმომადგენლებთან", - დასძინა ვუჩევიჩმა. Მან თქვა ასევე, რომ სერბეთი არ არის უკრაინაში ომის მომხრე და მხარს არ უჭერს ამ ქვეყნის ტერიტორიული მთლიანობის დარღვევას. Მილოშ ვუჩევიჩმა გაიხსენა ამა წლის ზაფხულში პუტინის შეხვედრა უნგრეთის პრემიერ-მინისტრთან, ვიქტორ ორბანთან, რომლის მოქმედებებმაც ასევე მკაცრი კრიტიკა გამოიწვია ევროკავშირის ხელმძღვანელობის მხრიდან. "ჩვენ ბოდიშს არ მოვიხდით ჩვენი პოლიტიკისთვის. Ჩვენ შეგვიძლია ის ავხსნათ", - განაცხადა ვუჩევიჩმა. Ვიცე-პრემიერ ალექსანდრ ვულინს აშშ-მა სანქციები დაუწესა სხვათა შორის, რუსეთთან მისი კავშირების გამო. სერბეთის პრეზიდენტმა, ალექსანდრ ვუჩიჩმა 31 აგვისტოს უარყო თავისი მჭიდრო კავშირები პუტინთან და პრაღის უსაფრთხოების კონფერენციის მონაწილეებს განუცხადა, რომ მისი ქვეყანა არ არის მოსკოვის "ტროას ცხენი", მიუხედავად იმისა, რომ ბელგრადმა უარი თქვა, შეერთებოდა სანქციებს რუსეთის წინააღმდეგ, უკრაინის ტერიტორიაზე მისი სრულმასშტაბიანი შეჭრის შემდეგ. ასევე ნახეთ ვუჩიჩი აცხადებს, რომ სერბეთი, რომელიც ევროკავშირისკენ ისწრაფვის, არ არის რუსეთის „ტროას ცხენი" ევროპაში ...