აშშ უახლოეს კვირებში კიევს დამატებით სამხედრო დახმარებას გაუგზავნის, განაცხადა აშშ-ს ეროვნული უსაფრთხოების საბჭოს სტრატეგიული კომუნიკაციების კოორდინატორმა ჯონ კირბიმ. 3 სექტემბერს მან თქვა, რომ პრეზიდენტ ჯო ბაიდენის ადმინისტრაცია გმობს რუსეთის სარაკეტო თავდასხმას პოლტავაზე, რომლის დროსაც ათობით ადამიანი დაიღუპა. კირბიმ განაცხადა, რომ ესთავდასხმა „კიდევ ერთი საშინელი შეხსენება იყო უკრაინელი ხალხის მიმართ რუსეთის პრეზიდენტის ვლადიმერ პუტინის სისასტიკის შესახებ.“ ეს თავდასხმა ხაზს უსვამს უკრაინის საჰაერო თავდაცვის გაძლიერების გადაუდებელ აუცილებლობას, დასძინა კირბიმ. უკრაინის ხელისუფლების ბოლო მონაცემებით, პოლტავას სამხედრო კომუნიკაციების ინსტიტუტზე ბალისტიკური რაკეტის თავდასხმის შედეგად 50-ზე მეტი ადამიანი დაიღუპა და 200-ზე მეტი დაშავდა. ამერიკის ხმა, ამერიკელ ოფიციალურ პირებზე დაყრდნობით, 3 სექტემბერს იტყობინება, რომ აშშ ახლოს არის შეთანხმებასთან, მიაწოდოს უკრაინას შორი დისტანციის ფრთოსანი რაკეტები, რომლებსაც შეუძლიათ მისწვდნენ სამიზნეებს რუსეთის ტერიტორიის სიღრმეში, მაგრამ მიწოდებასთან დაკავშირებული ტექნიკური პრობლემების მოგვარებას შეიძლება რამდენიმე თვე დასჭირდეს. სამი წყაროს თანახმად, რომლებიც ანონიმურობის პირობით ვინაობას არ ამხელენ, კიევში გაგზავნილი იარაღის პაკეტში შედის ჰაერო-ზედაპირის (Joint Air-to-Surface Standoff Missiles, JASSM) ტიპის ფრთოსანი რაკეტები. საბოლოო გადაწყვეტილება გამოცხადდება შემოდგომაზე. JASSM-ის უკრაინაში გაგზავნამ შეიძლება მნიშვნელოვნად შეცვალოს სტრატეგიული სიტუაცია, რადგან რუსეთის ტერიტორიაზე არსებული სამიზნეები უკვე იქნება დიაპაზონში, რომელსაც ამ ტიპს რაკეტები მიწვდება. აშშ-ს კვლავ რჩება ძალაში რუსეთის სიღრმეში ამერიკული იარაღით თავდასხმის აკრძალვა. აგვისტოს ბოლოს ამის შესახებ პენტაგონის სპიკერმა გენერალ-მაიორმა პატრიკ რაიდერმა ილაპარაკა. ასევე ნახეთ ჯეიმს ო’ბრაიენი შეხვედრებს მართავს კიევში ...