რუსეთის თავდაცვის სამინისტრომ ოთხშაბათს გამოაცხადა რუსული ჯარების მიერ უკრაინის დონეცკის ოლქის სოფლების, პრეჩისტოვკისა და კარლოვკის დაკავების შესახებ. ამ სოფლების ოკუპაციას ადასტურებენ უკრაინული წყაროებიც, კერძოდ პროექტი DeepState. კარლოვკა მდებარეობს დონეცკის დასავლეთით, ქალაქ პოკროვსკისკენ მიმავალ გზატკეცილზე. სოფლისთვის ბრძოლა რამდენიმე თვე გრძელდებოდა. უკრაინის ჯარებმა ის დატოვეს და უკან დაიხიეს რუსეთის ჯარების ჩრდილო-დასავლეთისკენ წინსვლისა და ალყაში მოქცევის საფრთხის გამო. ორივე მხარის ცნობით, ახლა ბრძოლები მიმდინარეობს კარლოვკის დასავლეთით, ქალაქების სელიდოვოსა და უკრაინსკის მისადგომებზე. პრეჩისტოვკა მდებარეობს ფრონტის სხვა მონაკვეთზე, უკრაინის თავდაცვის მსხვილი ცენტრის, უგლედარის დასავლეთით. ბოლო თვეების განმავლობაში აქ ფრონტი სტაბილურია. პრეჩისტოვკაზე რუსეთის ჯარების თავდასხმის შესახებ ცნობები რამდენიმე დღის წინ გავრცელდა. სამშაბათს საღამოს DeepState-მა გაავრცელა ინფორმაცია, რომ რუსეთის სამხედროებმა სოფელი დაიკავეს და ასევე დაწინაურდნენ უგლედარის აღმოსავლეთით მდებარე სოფელ ვოდიანოეს მიდამოში. ასევე ნახეთ ადამ მიხნიკი: პუტინის სიტყვას უფრო ნაკლები ფასი აქვს, ვიდრე მის ნახმარ წინდებს უკრაინელ სამხედროებს ოფიციალური განცხადება არ გაუკეთებიათ პრეჩისტოვკის დაკარგვის შესახებ. ISW-ს ანალიტიკოსები და რიგი უკრაინული წყაროები და მედია ბოლო კვირებში წერენ რუსეთის ჯარების მნიშვნელოვანი წინსვლის შესახებ ქალაქ პოკროვსკისკენ, დონეცკის რეგიონის დასავლეთით მდებარე მთავარი სატრანსპორტო კვანძისკენ. ბოლო დღეებში უგლედარზე თავდასხმის მცდელობებიც დაფიქსირდა. უკრაინის სარდლობა აღიარებს, რომ ამ რაიონებში დაძაბული ვითარება შეიქმნა. ...