აშშ-ის იუსტიციის სამინისტრომ სანქციების კანონმდებლობის დარღვევაში წაუყენა ბრალი რუსეთის „პირველი არხის“ პოლიტოლოგ დმიტრი საიმსსა და მის მეუღლე ანასტასიას. პირველი საბრალდებო დასკვნიდან გამომდინარეობს, რომ წყვილი მონაწილეობდა აშშ-ის სანქციების გვერდის ავლის სქემაში რუსული ტელეკომპანია „პირველი არხის“ სასარგებლოდ, ასევე ამ სქემის შედეგად მიღებული თანხების გათეთრებაში. აშშ-ის იუსტიციის სამინისტროს ცნობით, პოლიტოლოგი მომსახურებას უწევდა პირველ არხს და ანაზღაურების სახით მიიღო მილიონ დოლარზე მეტი, კერძო მანქანა, მძღოლი, ბინა მოსკოვში და ათი თანამშრომლისგან შემდგარი გუნდი. მეორე საბრალდებო დასკვნა ეხება ანასტასია საიმსს. გამომძიებლების თქმით, პოლიტოლოგის ცოლი მონაწილეობდა სანქციების გვერდის ავლის სქემაში რუსი ბიზნესმენის, ალექსანდრ უდოდოვის ინტერესებში. დოკუმენტში ნათქვამია, რომ მინიმუმ შარშან თებერვლიდან ის უდოდოვისთვის ხელოვნების ნიმუშებსა და ანტიკვარიატს ყიდულობდა აშშ-ისა და ევროკავშირის გალერეებსა და სააუქციონო სახლებში. შემდეგ ანასტასია საიმსი ნივთებს აგზავნიდა რეზიდენციაში ჰანტლიში, ვირჯინიის შტატში, სადაც ისინი ინახებოდა რუსეთში შემდგომი გაგზავნისთვის. აშშ-ის იუსტიციის სამინისტროს ცნობით, საიმსები ახლა რუსეთში არიან. შეერთებულ შტატებში საიმსისა და მისი მეუღლის მაქსიმალური შესაძლო სასჯელი 60-60 წლით თავისუფლების აღკვეთაა. „პირველ არხს“ აშშ-ის სანქციები აქვს დაწესებული 2022 წლის მაისიდან, ალექსანდრ უდოდოვს - 2023 წლის თებერვლიდან. ასევე ნახეთ აშშ სანქციებს უწესებს RT-ს, "რია ნოვოსტის" და მარგარიტა სიმონიანს დმიტრი საიმსი მოსკოვში დაიბადა და 1973 წელს აშშ-ში წავიდა ემიგრაციაში. ის გამოსცემდა კონსერვატიულ ჟურნალ The National Interest-ს, რომლის პუბლიკაციებს ხშირად იმოწმებს რუსეთის სახელმწიფო მედია. 2018 წლიდან ის რუსეთში მუშაობს და „პირველ არხზე“ უძღვება სოციალურ-პოლიტიკურ ტოქშოუს „დიდი თამაში“. 2023 წელს ის მოდერაციას უწევდა სანქტ-პეტერბურგის ეკონომიკური ფორუმის სესიას, რომელშიც რუსეთის პრეზიდენტი ვლადიმირ პუტინი მონაწილეობდა. ჟურნალისტების თქმით, საიმსი 2016 წელს დონალდ ტრამპის საპრეზიდენტო კამპანიასთან იყო დაკავშირებული. პოლიტოლოგის სახელი ნახსენები იყო სპეციალური პროკურორის, რობერტ მიულერის გამოძიებებში ტრამპის კამპანიასა და კრემლს შორის შესაძლო კავშირების შესახებ. ამავე დროს მიულერი მივიდა დასკვნამდე, რომ საიმსი არ იყო მოსკოვსა და ტრამპს შორის შუამავალი. ...