პოლიცია ალექსანდრე სამხარაძეს ედავებოდა წვრილმან ხულიგნობას - ადმინისტრაციულ სამართალდარღვევათა კოდექსის 166-ე მუხლით გათვალისწინებულ დარღვევას. სასამართლოში მტკიცებულებად იყო წარდგენილი ორი ვიდეო - მათგან ერთი, 2:45 წუთის ხანგრძლივობის ჩანაწერი თავად ლექსო სამხარაძის გადაღებულია და ის იმავე დღეს ვირუსულად გავრცელდა ტრადიციულ და სოციალურ მედიაში, მეორე კი, უფრო მოკლე, 45 წამიანი ვიდეო სავარაუდოდ ერთ-ერთი დეპუტატის მანქანიდან არის გადაღებული. 28 მაისს, როცა შემთხვევა მოხდა, საქართველოს პარლამენტმა პრეზიდენტის ვეტო საკანონმდებლო ორგანოსთან საპროტესტო აქციის ფონზე დაძლია. იმ დღეს პოლიციამ ხალხმრავალი პროტესტის გამო პარლამენტის მიმდებარე ქუჩები გადაკეტა და დეპუტატებს ქიქოძის ქუჩის გავლით დაატოვებინა ტერიტორია. სწორედ იქ შეხვდა ალექსანდრე სამხარაძე „აგენტების კანონის“ მხარდამჭერ დეპუტატებს. „მივდიოდი აქციაზე, შემხვდა დეპუტატების კოლონა, ვთვლი რომ სიტყვისა და გამოხატვის თავისუფლებაში სრულად ჯდება, მე ვაჟღერებდი პოლიტიკურ მესიჯებს და ეს ენა უცხო არ არის არც ქართული პოლიტიკური ცხოვრებისთვის. ვიდეოში ნათლად ჩანს რომ ჩემი სიტყვები მიემართება დეპუტატებს და არა სხვა მოქალაქეებს“ - უთხრა სასამართლოს 9 სექტემბერს გამართულ სხდომაზე ალექსანდრე სამხარაძემ. ის ცდილობდა მოსამართლისთვის აეხსნა, რომ მართალია ჩანაწერის ნაწილში ნამდვილად ისმის უცენზურო სიტყვები და უშვერი სიტყვებით გინება, რაც გამოხატვის თავისუფლების ნაწილში შეიძლება არ ჩაითვალოს, მაგრამ ამ ლექსიკის გამოყენება მან მას შემდეგ დაიწყო, რაც ერთ-ერთმა დეპუტატმა მის საპროტესტო შეძახილებს გინებით უპასუხა ავტომობილიდან. თითქმის სამწუთიანი ვიდეოს პირველი მართლაც არ მოიცავს უხამს ლექსიკას და გინებას - ამ კადრებში მკვეთრად არ ჩანს დეპუტატი, რომელიც აგინებს მოქალაქეს, თუმცა იდენტიფიცირებადია პარლამენტარი ვიქტორ ჯაფარიძე, რომელიც ავტომობილიდან გამოდის, მისდევს ალექსანდრე სამხარაძეს და ქუჩაში გამოდგმული დახლიდან აღებულ ფორთოხალს ესვრის მას. ამავე ვიდეოში ჩანან მოქალაქეები, რომლებიც არ გამოხატავენ მომხდარით უკმაყოფილებას და არ ერთვებიან ინცინდენტში. "თმენის ვალდებულება აკისრიათ დეპუტატებს. გურამ მაჭარაშვილმა ჩამოწეული მანქანიდან დაიწყო ჩემს მიმართ უშვერი სიტყვების გამოყენება, დედის გინება და ჟესტების ჩვენება. მოხდა ისე, რომ იმათ გინებას ვუპასუხე გინებით. სამართლიანი იქნება თუ მე მომეკითხება პასუხი, იმათაც მოეკითხოთ პასუხი" - უთხრა მოსამართლეს ლექსო სამხარაძემ. "იმათი პასუხის გება არ არის სასამართლოს პასუხისმგებლობა" - ამ რეპლიკით უპასუხა მას მოსამართლემ და განუმარტა, რომ მას ჰქონდა უფლება, მიემართა პოლიციისთვის, თუკი თვლიდა, რომ დეპუტატებმა მას შეურაცხყოფა მიაყენეს და მისი უფლებები დაარღვიეს. ...