კრემლის პრესმდივანმა, დმიტრი პესკოვმა პირდაპირ არ უარყო ცნობები, რომ ირანმა შესაძლოა რუსეთს გადასცა მცირე რადიუსის ბალისტიკური რაკეტები. ორშაბათს გამართულ ბრიფინგზე პესკოვმა თქვა, რომ მოსკოვი და თეირანი ავითარებენ თანამშრომლობას "ყველა შესაძლო სფეროში, მათ შორის ყველაზე მგრძნობიარე სფეროებში", და "ამის კეთებას გააგრძელებენ". ამავე დროს, რაკეტების მიწოდების შესახებ ცნობებზე ლაპარაკისას, პესკოვმა აღნიშნა, რომ "ამგვარი ტიპის ინფორმაცია ყოველ ჯერზე არ შეესაბამება სინამდვილეს". იმის შესახებ, რომ ირანმა უკვე გადასცა რუსეთს რაკეტები შესაძლოა უკრაინის წინააღმდეგ ომში გამოსაყენებლად, გასულ კვირაში წყაროებზე დაყრდნობით იტყობინებოდნენ The Wall Street Journal-ი და CNN-ი. ირანი ოფიციალურად ამ ცნობას უარყოფს. ისლამური რევოლუციის გუშაგთა კორპუსის მაღალი რანგის მეთაურმა, ფაზლულა ნოზარიმ ორშაბათს ირანის მედიასაშუალებებს უთხრა, რომ რაკეტების გადაცემის შესახებ დასავლური ცნობები წარმოადგენს "ფსიქოლოგიური ომის" ნაწილს. როგორც Associated Press-ი 8 სექტემბერს იუწყებიდა, აშშ-მა თავის მოკავშირეებს მიაწოდა ინფორმაცია, რომ ირანმა, ვაშინგტონის შეფასებით, რუსეთს გადასცა მცირე რადიუსის ბალისტიკური რაკეტები, უკრაინაში რუსეთის სამომავლო საბრძოლო მოქმედებებისთვის. წყაროებს, რომლებიც სააგენტოს ანონიმურობის დაცვის პირობით ესაუბრნენ, დეტალები არ მოაქვთ იმის შესახებ, თუ რამდენი იარაღი იქნა გადაცემული, ან როდის შედგა გადაცემის პროცესი. ოფიციალურად თეთრ სახლს ჯერჯერობით არ დაუდასტურებია, რომ ირანმა რუსეთს მართლაც გადასცა რაკეტები. აშშ-ის უშიშროების საბჭოში აცხადებენ, რომ თუ ეს ცნობები დადასტურდება, ეს იქნება ნიშანი "მნიშვნელოვანი ესკალაციისა". უკრაინის საგარეო საქმეთა სამინისტრომ ღრმა შეშფოთება გამოხატა მედიაში გავრცელებულ ცნობებზე და განაცხადა, რომ დადასტურების შემთხვაში ამ ცნებებს ექნება "დამანგრეველი შედეგები" უკრაინა-ირანის ურთიერთობისთვის. წარსულში ირანს რუსი შემკვეთებისთვის უკვე მიწოდებული აქვს ასობით დრონი, რომლებიც მოსკოვმა უკრაინის წინააღმდეგ ომში გამოიყენა. თუმცა თეირანი უარყოფდა ინფორმაციას, რომ მიწოდება განხორციელდა უკრაინაში რუსეთის სრულმასშტაბიანი შეჭრის შემდგომ პერიოდში. ირანი ირწმუნება, რომ ამ კონფლიქტში ნეიტრალურ პოზიციას იცავს. ასევე ნახეთ ირანელმა დეპუტატმა დაადასტურა რუსეთისთვის ბალისტიკური რაკეტების მიწოდება, თუმცა ოფიციალურად ამას ყველა უარყოფს ...