უშიშროების საბჭოში აფრიკის სახელმწიფოებს ორი მუდმივი ადგილი უნდა ჰქონდეთ, ამბობს გაეროში აშშ-ის წარმომადგენელი ლინდა თომას-გრიინფილდი. მან Reuters-ის სააგენტოს უთხრა, მისი ქვეყანა ასევე დაუჭერს მხარს უშიშროების საბჭოში კუნძულოვანი განვითარებადი სახელმწიფოების დროებით წევრობას. აშშ-ის ინიციატივის მიზანია, რომ გამოწვევები, რომლებიც უკავშირდება ამ ქვეყნებს, მაგალითად, როგორიცაა კლიმატის ცვლილებები, უკეთ იქნეს აღქმული. მომავლისთვის, ამ წინადადებებს უნდა მოჰყვეს უშიშროების საბჭოს საფუძვლიანი რეფორმა, თვლის აშშ-ის ელჩი გაეროში. ვაშინგტონ ი უკვე წლების წინ ემხრობოდა უშიშროების საბჭოში გერმანიის, იაპონიის და ინდოეთის მუდმივ წევრებად მიღებას. ეს ბოლო ინიციატივა იმ დროს გამოცხადდა, როცა აშშ ცდილობს გააუმჯობესოს ურთიერთობები აფრიკის და წყნარი ოკეანის კუნძულოვან სახელმწიფოებთან. გაეროს უშიშროების საბჭოს ხუთი, ვეტოს უფლების მქონე მუდმივი წევრი ჰყავს, ესენია აშშ, გაერთიანებული სამეფო, საფრანგეთი, რუსეთი და ჩინეთი. საბჭოს ათ დროებით წევრს 2 წლის ვადით ირჩევს გენერალური ასამბლეა რეგიონული განაწილების პრინციპის მიხედვით: ხუთი წევრი აფრიკიდან და აზიიდან (მათ შორის ერთი წევრი არაბული სახელმწიფოებიდან), ორი წევრი ლათინური ამერიკიდან და კარიბის ზღვის აუზის ქვეყნებიდან, ორი წევრი დასავლეთ ევროპიდან, ერთი - აღმოსავლეთ ევროპიდან. ასევე ნახეთ გაეროს ასამბლეამ დაამტკიცა რეზოლუცია, რომელიც პალესტინას ახალ უფლებებს ანიჭებს ...