რუსეთის თავდაცვის სამინისტროს ცნობით, წუხელ რუსეთის ტერიტორიაზე 29 უპილოტო საფრენი აპარატი ჩამოაგდეს. მათგან 15 დაიჭირეს ბრიანსკის ოლქის თავზე, ხუთი კურსკის ოლქის, ოთხი სმოლენსკის ოლქის თავზე, ორი ორიოლის ოლქის თავზე და თითო-თითო ბელგოროდის, კალუგისა და როსტოვის ოლქების ტერიტორიებზე. ბელგოროდის ოლქის შებეკინოს რაიონში მთელი ღამის განმავლობაში აქრობდნენ ხანძარს, რომელიც გუშინ გაჩნდა, სავარაუდოდ, უპილოტო საფრენი აპარატის ჩამოვარდნის შემდეგ. ტყეში იწვის ძველი შეშა და ხის ნარჩენები. რეგიონის გუბერნატორმა ვიაჩესლავ გლადკოვმა დილით განაცხადა, რომ ხანძარი ჯერ არ არის ლოკალიზებული, თუმცა ადგილზე სახანძრო ეკიპაჟები აგრძელებენ მუშაობას. მსხვერპლი არ ყოფილა. მიმდინარე წლის გაზაფხულიდან რუსეთის სხვადასხვა რეგიონი, განსაკუთრებით უკრაინის საზღვრის მახლობლად, ყოველდღიურად იბომბება და ხორციელდება დრონების თავდასხმები. მოსკოვი მათში უკრაინის შეიარაღებულ ძალებს ადანაშაულებს. უკრაინის სარდლობა, როგორც წესი, დაბომბვაზე კომენტარს არ აკეთებს. ასევე ნახეთ ბელარუსის ტერიტორიაზე კვლავ შეფრინდა რუსული სამხედრო დრონი ...