სოხუმის გარეუბანში 15 სექტემბრის საღამოს თავს დაესხნენ ჟურნალისტს, ტელეგრამის არხის, „Абхазский портал-ის" ადმინისტრატორს, დავით გობეჩიას და მოძრაობა „ХарахПицунда-ს" (ჩვენი ბიჭვინთა) წარმომადგენელს, ლია აგრბას. ნიღბიანმა თავდამსხმელებმა გამოიყენეს გაზის ბალონი, ამის შემდეგ გობეჩიას სცემეს და ამის ამსახველი ვიდეო გადაიღეს, ლია აგრბას კი ნიღბიანმა პირებმა ჩანთა გასტაცეს. გობეჩიას თქმით, მანამდე მას უთვალთვალებდნენ. „მტრები არ მყავს, არაფრისთვის დამესხმებოდნენ თავს. ჩემი ვარაუდით, ეს ხელისუფლების ნამოქმედარია, - თქვა გობეჩიამ და დაამატა, - მათ ესმით, რომ ჩვენ შევაჩერებთ ჩვენი ქვეყნის გაყიდვას, ამის საშუალებას არ მივცემთ". დავით გობეჩიას და ლია აგრბას წინააღმდეგ "ჩადენილი თავხედური დანაშაული არის აშკარა მცდელობა, ნებისმიერ ფასად ხელი შეუშალონ სამართლიანობისთვის, დემოკრატიისა და აფხაზეთის ეროვნული ინტერესების დაცვისთვის ბრძოლას, განაცხადეს ოპოზიციურმა პარტიებმა და საზოგადოებრივმა ორგანიზაციებმა „აფხაზეთის ეროვნული ერთიანობის ფორუმმა“, „აფსნიმ“, „აფხაზთა სახალხო მოძრაობამ“, „არუაამ“ და „ჩვენმა დედაქალაქმა“. მათ მოითხოვეს გამოვლენა დამნაშავეებისა, რომლებიც, მათი თქმით, სავარაუდოდ, ხელისუფლების დაკვეთას ასრულებენ. „აფხაზთა სახალხო მოძრაობის“ ლიდერის, ადგურ არძინბას განცხადებით, „ბლოგერებზე ნიღბებით თავდასხმა სიმხდალის უმაღლესი დონეა“. ჟურნალისტმა, გაზეთ „Чегемская правда-ს" რედაქტორმა ინალ ხაშიგმა მომხდარს "პოლიტიკური ტერორის აქტი" უწოდა. საინფორმაციო სააგენტო “აიაშარას“ ხელმძღვანელმა ნიზფა არშბამ კი თქვა, რომ არ იცის ვისი ორგანიზებულია თავდასხმა, მაგრამ „მათ მიზანს ვერ მიაღწიეს“. ოკუპირებული აფხაზეთის ე.წ. შინაგან საქმეთა სამინისტროს განცხადებით, ორ მოქალაქეზე თავდასხმის ფაქტს იძიებენ. დე ფაქტო უწყება დაკავებულების ან ეჭვმიტანილების შესახებ ინფორმაციას არ ავრცელებს. ...