ჩეჩნეთის სპეცდანიშნულების რაზმის, „ახმატის“ მეთაურმა და რუსეთის არმიის მთავარი სამხედრო-პოლიტიკური სამმართველოს უფროსის მოადგილემ, აპტი ალაუდინოვმა, თქვა, რომ ის არ აპირებს ტყვეობიდან ჩეჩნეთის იმ მკვიდრთა გამოხსნას, რომლებიც დანებდნენ კურსკის ოლქში უკრაინის შეიარაღებული ძალების იერიშის დროს. ალაუდინოვმა მათ მოუწოდა, „ყველაფერი გააკეთონ, რომ ისინი მოკლან“. განცხადებაში, რომელიც ალაუდინოვმა თავის ტელეგრამის არხზე გამოაქვეყნა, მან თქვა, რომ ის ეხმარება მხოლოდ იმ თანამემამულეებს, რომლებიც იბრძოდნენ, რომლებიც მძიმე ჭრილობების გამო ჩაიგდეს ტყვედ. ის, ვინც წინააღმდეგობის გარეშე ჩაბარდა, „ახმატის“ მეთაურის თქმით, „არ იმსახურებს სიცოცხლეს“. „უკრაინელებო, გყავდეთ ისინი თქვენთვის, ჩვენ არ გვჭირდება ისინი, ჩემთვის არავითარი მნიშვნელობა არა აქვს, რას უზამთ მათ“, - შეაჯამა ალაუდინოვმა. მანამდე უკრაინელმა ფოტოჟურნალისტმა იან დობრონოსოვმა გამოაქვეყნა კურსკის ოლქში დატყვევებული ჩეჩნეთის სოფელ ვალერიკის ყოფილი ხელმძღვანელის, მაგომედ ზარახმატოვის ვიდეო. კადრებში ის ამბობს, რომ იყო რიგითი ჯარისკაცი, 14 აგვისტოს კურსკის ოლქის სუჯის რაიონში ჩავარდა ტყვედ, წინააღმდეგობა არ გაუწევია, საბრძოლველად კი ის ძალდატანებით გაგზავნეს. ასევე ნახეთ რუსეთმა და უკრაინამ ტყვეები გაცვალეს უკრაინის არმიამ 6 აგვისტოს დაიწყო კურსკის ოლქში შეტევა. უკრაინის შეიარაღებული ძალები აცხადებენ, რომ აკონტროლებენ ათეულობით დასახლებას, მათ შორის რაიონულ ცენტრ სუჯას, ათას კვადრატულ კილომეტრზე მეტ ტერიტორიას და დატყვევებული ჰყავთ რუსეთის ასობით ჯარისკაცი. კურსკის რეგიონში ფედერალური საგანგებო მდგომარეობა მოქმედებს. ოფიციალური მონაცემებით, სასაზღვრო რაიონებიდან 130 ათასზე მეტი ადამიანის ევაკუაცია განხორციელდა. უცნობია, რამდენი ადამიანი რჩება უკრაინის ჯარების მიერ ოკუპირებულ ტერიტორიებზე, თუმცა, არსებული მონაცემებით, მათი რაოდენობა მინიმუმ ასეულებია. რუსეთის ტერიტორიაზე უკრაინის შეიარაღებული ძალების გარღვევის დაწყებიდან აპტი ალაუდინოვმა ათობით ვიდეო ჩაწერა და სოციალურ ქსელებში გამოაქვეყნა კურსკის ოლქში მისი ქვედანაყოფის სამხედრო წარმატებების შესახებ. მან არაერთხელ დადო პირობა, რომ რეგიონში „მომავალი რამდენიმე დღის განმავლობაში“ დაამყარებდა ვითარებაზე კონტროლს. ...