რუსეთის პრეზიდენტმა ვლადიმირ პუტინმა ხელი მოაწერა ბრძანებას, რომლითაც კიდევ ერთხელ იზრდება ქვეყნის შეიარაღებული ძალების საშტატო პერსონალის რიცხვი. ბრძანების თანახმად, ეს იქნება 2 389 130 ერთეული, მათ შორის ზუსტად 1,5 მილიონი სამხედრო მოსამსახურე. წინა ჯერზე ანალოგიურ ბრძანებას ხელი გასული წლის დეკემბერში მოეწერა. მაშინ სამხედრო მოსამსახურეთა რაოდენობა 1 320 000-ით განისაზღვრა. ამდენად, სამხედროთა საშტატო რაოდენობა იზრდება 180 ათასით, თუმცა შეიარაღებული ძალების სამოქალაქო შტატი უწინდელ დონეზე რჩება. 2023 წლის 1 იანვრიდან - ანუ ორ წელზე ნაკლებ დროში - რუსეთის სამხედრო მოსამსახურეთა საშტატო რაოდენობა თითქმის 350 ათასი ადამიანით გაიზარდა. ახალი ბრძანება ამოქმედდება 2024 წლის 1 დეკემბრიდან, ანუ არმიაში საშემოდგომო გაწვევის დასრულების შემდეგ. კრემლს და თავდაცვის სამინისტროს ჯერჯერობით განცხადება არ გაუკეთებიათ სამხედროთა საშტატო რაოდენობის მორიგი გაზრდის თაობაზე. შარშანდელი მატება მათ დააფუძნეს "ქვეყნისთვის საფრთხეების ზრდას, რაც უკავშირდება სპეციალურ სამხედრო ოპერაციას [მოსკოვი ასე უწოდებს უკრაინაში შეჭრას] და ნატოს გაფართოების გაგრძელებას". 1,5 მილიონი ადამიანი ოდნავ აჭარბებს რუსეთის მოსახლეობის ერთ პროცენტს. ასევე ნახეთ ზელენსკიმ დასავლეთს იარაღის გადაცემისკენ მოუწოდა, ლემიმ პუტინს "იმპერიალისტი ფაშისტი" უწოდა ...