ირანელი ქურთი სტუდენტის, გარდაცვლილი მაჰსა ამინის ოჯახთან დაახლოებულმა პირებმა რადიო თავისუფლების ირანულ სამსახურს 15 სექტემბერს უთხრეს, რომ გარდაცვალების მეორე წლისთავზე უსაფრთხოების სამსახურების წარმომადგენლებმა საღეზში მაჰსა ამინის სახლს ალყა შემოარტყეს და ოჯახის წევრებს არ მისცეს სახლიდან გასვლის საშუალება. ერთ-ერთი წყაროს ინფორმაციით, ამინის მამას, ამჯად ამინის, ირანის დაზვერვის სამინისტროდან დაურეკეს და უთხრეს, რომ ოჯახის წევრებს სახლი არ უნდა დაეტოვებინათ და რომ წინააღმდეგ შემთხვევაში მათ დააპატიმრებდნენ. ამავე წყაროს ინფორმაციით, საღეზის თავზე ისმოდა ვერტმფრენების ხმა. 22 წლის მაჰსა ამინი მორალის პოლიციამ დააკავა, როგორც იუწყებოდნენ ჰიჯაბის ტარების წესების დარღვევის გამო, რის შემდეგაც ის გარდაიცვალა. გავრცელდა ცნობები, რომ ამინი პოლიციამ დაკავებისას სცემა. მისმა სიკვდილმა მასშტაბური აქციები გამოიწვია მთელი ქვეყნის მასშტაბით - ირანელები აპროტესტებდნენ საპოლიციო სისასტიკეს და ქალების უფლებების დარღვევას. მამამისმა, ამჯად ამინიმ, გასულ კვირაში რადიო თავისუფლების ირანულ სამსახურს უთხრა, რომ ოჯახს აქვს უფლება, აღნიშნოს თავისი შვილის სიკვდილის მეორე წლისთავი, და იმედი გამოთქვა, რომ ეს ასეც მოხდებოდა, თუკი ოფიციალური უწყებები ამის უფლებას გასცემდნენ. ბოლო ორი დღის განმავლობაში, ირანიდან ვრცელდება ცნობები, რომ აკავებენ საპროტესტო აქციებზე სახელმწიფო უწყებების მხრიდან ზეწოლის შედეგად დაღუპულთა ოჯახების წევრებს. პატიმრობაში მყოფი ნობელის პრემიის ლაურეატის, ირანელი ნარგეს მოჰამადის ფონდმა 15 სექტემბერს გაავრცელა ცნობა, რომ საპროტესტო აქციების დაწყებიდან ორი წლისთავის აღნიშვნის მიზნით, ირანში 34 პატიმარი ქალი შიმშილობს. ასევე ნახეთ „ქალი, სიცოცხლე, თავისუფლება“ და ცვლილებათა შრეები ირანის საზოგადოებაში ...