ბელარუსის ავტორიტარმა ლიდერმა ალიაქსანდრ ლუკაშენკამ 16 სექტემბერს ხელი მოაწერა შეწყალების ბრძანებას 37 პატიმრისთვის, რომლებიც სასჯელს იხდიან "ექსტრემისტული მიმართულების" დანაშაულებისთვის. როგორც რადიო თავისუფლების ბელარუსული სამსახური იუწყება, შეწყალებულებს შორის ექვსი ქალია. შეწყალებულებს შორის არიან საპენსიო ასაკის მსჯავრდადებულები და პირები, რომლებსაც სერიოზული დაავადებები აქვთ. ლუკაშენკას პრესსამსახურმა პოლიტპატიმრების გათავისუფლებას უწოდა "სახელმწიფოს მხრიდან ჰუმანურობის კიდევ ერთი ჟესტი". პრესსამსახური აზუსტებს, რომ ყველა შეწყალებულმა "მოინანია და პირობა დადო, რომ კანონმორჩილად იცხოვრებს". პრესსამსახური აცხადებს, რომ შეწყალება მიემართება ეროვნული ერთობის დღეს, რომელსაც 17 სექტემბერს აღნიშნავენ. ივლისის შემდეგ ეს არის ლუკაშენკას მეოთხე ბრძანება პოლიტპატიმრების გათავისუფლებაზე. ივლისის დასაწყისში საპატიმრო დატოვა 18 ოპოზიციონერმა, აგვისტოში კი - 30 მსჯავრდადებულმა, რომლებიც სასჯელს იხდიდნენ 2020 წლის საპროტესტო აქციებში მონაწილეობისთვის და სხვა "საპროტესტო მიმართულების დანაშაულებისთვის". კიდევ 30 პირი სექტემბერში შეიწყალეს. შეწყალებულთა ვინაობა ოფიციალურად არ დაუსახელებიათ, თუმცა ზოგიერთს რადიო თავისუფლების ბელარუსული სამსახური ასახელებს. მათ შორის, ფაქტობრივად, არ არიან ცნობილი ოპოზიციონერი პოლიტიკოსები ან აქტივისტები. 2020 წლის აგვისტოში გამართული არჩევნების შემდეგ, ბელარუსის ცენტრალურმა საარჩევნო კომისიამ გამოაცხადა, რომ პრეზიდენტად მეექვსე ვადით არჩეულია ალიაქსანდრ ლუკაშენკა. ოპოზიცია ამას არ დაეთანხმა. იგი აცხადებდა, რომ არჩევნებში გამარჯვება მოიპოვა მათმა კანდიდატმა სვიატლანა ციხანოუსკაიამ. გაყალბების წინააღმდეგ და დემოკრატიის მხარდასაჭერად მთელი ქვეყნის მასშტაბით დაიწყო მასობრივი გამოსვლები. უსაფრთხოების ძალების თანამშრომლები აქციების მონაწილეთა წინააღმდეგ მძიმე რეპრესიებს ახორციელებდნენ. უფლებადამცველთა მონაცემებით, აქციების დაშლისას დაიღუპა, სულ მცირე, რვა ადამიანი. ხელისუფლებამ აღძრა სისხლის სამართლის ათასობით საქმე. ასობით მოქალაქეს, ოპოზიციის ლიდერების ჩათვლით, ხანგრძლივი ვადით მიესაჯა პატიმრობა. ბელარუსში ამჟამად არის ათასზე მეტი მსჯავრდადებული, რომლებიც უფლებადამცველ ორგანიზაციებს პოლიტპატიმრებად ჰყავთ აღიარებული. ასევე ნახეთ უკრაინა აცხადებს, რომ მის საზღვართან ბელარუსმა მნიშვნელოვანი რაოდენობის სამხედრო ძალა შეკრიბა ...