რუსეთის მიერ ოკუპირებული აფხაზეთის დე ფაქტო პრეზიდენტის, ასლან ბჟანიას საიტზე ჰაკერებმა შეაღწიეს და გამოაქვეყნეს ინფორმაცია, რომელიც სინამდვილეს არ შეესაბამება. ამის შესახებ, როგორც რადიო თავისუფლების პროექტი „ეხო კავკაზა“ წერს, 16 სექტემბერს ღამით განაცხადა ბჟანიას ადმინისტრაციამ. მისივე ცნობით, ინფორმაცია დაიბლოკა, სპეციალისტები კი მომხდარს არკვევენ და პორტალის მუშაობას აღადგენენ. ინფორმაციით, რომლის გავრცელებაც კიბერშეტევით ახსნეს, აფხაზეთმა რუსეთის ნაცვლად „სტრატეგიულ პარტნიორად" თურქეთი გამოაცხადა და რუსულის ნაცვლად თურქული ბაზების განთავსება გადაწყვიტა. ტელეგრამ-არხებით 16 სექტემბერს გავრცელდა ბჟანიას საიტზე გამოქვეყნებული ცნობა სათაურით: „აფხაზეთის პრეზიდენტმა გაწყვიტა შეთანხმება აფხაზეთის ტერიტორიაზე რუსეთის სამხედრო-საზღვაო ძალების განთავსების შესახებ“. (ასლი იხილეთ აქ). დე ფაქტო პრეზიდენტის საიტზე ეწერა, რომ ბჟანიამ თურქეთის პრეზიდენტ ერდოანს გაუგზავნა წინადადება, ხელი მოაწერონ „მეგობრობის და პარტნიორობის ორმხრივ შეთანხმებას" და განაცხადა, რომ მისაღებია „რთული, თუმცა ხალხისთვის სწორი გადაწყვეტილებები", თურქეთის სახით შეიძენენ „თავდაცვის სფეროში ერთადერთ და საიმედო მოკავშირეს“ და რუსულ ბაზებს თურქეთის სამხედრო-საზღვაო ძალების ბაზები შეცვლიან. „ამიერიდან თურქეთი ხდება ჩვენი ერთადერთი სტრატეგიული პარტნიორი“, - ნათქვამი იყო ბჟანიას სახელით. ამავე ცნობის მიხედვით, ეს „იძულებითი არჩევანი“ გამოიწვია „ცარიელმა დაპირებებმა“, რომლებითაც აფხაზებს წლებია „თავგზას უბნევენ". ბჟანიას სახელით გავრცელებული ამ „განცხადების" ფონია რუსეთის გადაწყვეტილება აფხაზეთისთვის დაფინანსების შეჩერების შესახებ. ასევე ნახეთ მოსკოვმა სოხუმს „გამოსაფხიზლებელი წიხლი“ უთავაზა - როგორ შემოსწყრა კრემლი ოკუპირებულ აფხაზეთს? თურქეთის სახელმწიფო საქართველოს ტერიტორიულ მთლიანობას საერთაშორისოდ დადგენილ საზღვრებში აღიარებს. ...