საქართველოში საექსტრადიციო პატიმრობაში მყოფ აზერბაიჯანელ ჟურნალისტ აფგან სადიგოვს შინაგან საქმეთა სამინისტროს მიგრაციის დეპარტამენტმა საერთაშორისო თავშესაფრის მინიჭებაზე უარი უთხრა. არასამთავრობო ორგანიზაცია „უფლებები საქართველოს“ იურისტმა დიმიტრი ნოზაძემ, რომელიც სადიგოვის ინტერესებს იცავს, რადიო თავისუფლებას უთხრა, რომ მას შემდეგ, რაც მიგრაციის დეპარტამენტის პასუხი ოფიციალურად ჩაჰბარდებათ, სასამართლოს მიმართავენ. „[აფგან სადიგოვს] ციხეში მიუვიდა პასუხი აზერბაიჯანულ ენაზე. ჯერ ქართულენოვანი წერილი არ ჩაგვბარებია. როგორც თვითონ მითხრა, უარი უთხრეს საერთაშორისო თავშესაფარზე. როდესაც ჩაგვბარდება დასაბუთებული გადაწყვეტილება, რა თქმა უნდა, მივმართავთ სასამართლოს, რისთვისაც ერთი თვე გვექნება. თავად სასამართლო რამდენ ხანში მიიღებს გადაწყვეტილებას, ამას ვერ გეტყვით“, - თქვა ნოზაძემ რადიო თავისუფლებასთან საუბარში. ადვოკატის განმარტებით, ჯერ დღის დღის წესრიგში არ დგას სადიგოვის აზერბაიჯანში ექსტრადიციის საკითხი. „სასამართლო საბოლოოდ რა გადაწყვეტილებას მიიღებს, იმის მიხედვით უნდა ვილაპარაკოთ, რა იქნება. თუ საჭირო გახდება, ზემდგომ ინსტანციასაც მივმართავთ“, - დაამატა მან. აზერბაიჯანული მედიაგამოცემა Azel.Tv-ის მთავარი რედაქტორი აფგან სადიგოვი 3 აგვისტოს თბილისში დააკავეს. საქართველოში იგი 2023 წლის დეკემბერში ჩამოვიდა და დაკავებამდე ორი კვირით ადრე ქვეყნის დატოვება უნდოდა, მაგრამ აეროპორტში ამის საშუალება არ მისცეს. 4 აგვისტოს კი თბილისის საქალაქო სასამართლომ აფგან სადიგოვს სამთვიანი საექსტრადიციო პატიმრობა შეუფარდა. მისმა ცოლმა სევინჩ სადიგოვამ ჟურნალისტებს უთხრა, რომ ბაქო აფგან სადიგოვს კრიტიკული პოზიციისთვის დევნის და რომ სამშობლოში ექსტრადიციის შემთხვევაში, მას სიკვდილი ემუქრება. ასევე ნახეთ აზერბაიჯანელ ჟურნალისტს თბილისში საექსტრადიციო პატიმრობა შეეფარდა ასევე ნახეთ Amnesty International-ი გამოდის მოწოდებით, არ მოხდეს აფგან სადიგოვის ექსტრადირება აზერბაიჯანში თბილისის საქალაქო სასამართლოს მოსამართლის განმარტებით, სასამართლოში წარდგენილი ინფორმაციით, სადიგოვს აზერბაიჯანის რესპუბლიკაში ბრალად ედება შეურაცხმყოფელი ინფორმაციის გავრცელების მუქარა, ადამიანებისგან დიდი ოდენობით ქონების ხელში ჩაგდების მიზნით. 15 აგვისტოს თბილისის სააპელაციო სასამართლომ განუხილველი დატოვა სადიგოვის საჩივარი, რომელიც შეეხებოდა მისი საექსტრადიციო პატიმრობის გაუქმების მოთხოვნას. ასევე ნახეთ სააპელაციომ აზერბაიჯანელი ჟურნალისტის საჩივარი განუხილველი დატოვა ასევე ნახეთ "თავისუფლება სადიგოვს" - თბილისში მხარს უჭერენ საქართველოში დაკავებულ აზერბაიჯანელ ჟურნალისტს ...